Snapchat ka prezantuar një mini-dron të quajtur Pixy, i cili do të mund të regjistrojë video në këndin që ju dëshironi dhe kur nuk keni pranë mikun tuaj. Ai vjen në përmasa shumë të vogla dhe në ngjyrë të verdhë, dhe do të kushtojë $229.99.
“Sot ne do të çojmë fuqinë dhe magjinë e Snap Camera – spontanitetin, kënaqësinë dhe lirinë e saj – akoma dhe më tej. Një kamera e re e cila do të përshtatet me potencialin e palimituar të imagjinatës tuaj.” tha CEO i Snapchat, Evan Spiegel gjatë Snap Partner Summit.
Pixy nuk është i ngjashëm me dronët e tjerë pasi ai nuk ka një controller madje as hapësirë për SD card. Me sa duket kompania e ka optimizuar këtë pajisje për të qenë sa më e lehtë për t’u përdorur. Në dron gjendet një buton për aktivizimin e tij dhe një kamera.
Ju mund të zgjidhni 4 modalitete fluturimi: Pixy mund të qëndrojë pezull, të rrotullohet rreth jush apo t’ju ndjekë ju ndërkohë që ecni apo vraponi. Kur ju të dëshironi të ndërprisni regjistrimin, mjafton të vendosni dorën poshtë dronit, dhe ai do të ulet automatikisht aty. Video më pas do të transferohet automatikisht në pajisjen tuaj, dhe përmes Snapchat ju do të mund ta editoni atë.
Pixy regjistron video në kualitet 2.7K dhe shkrep fotografi 12MP. Ai është shumë i lehtë, pasi peshon vetëm 101 g dhe ka një bateri të ndërrueshme. Në një karikim të vetëm, Pixy mund të kryejë 5-12 fluturime.
