Një shtetas ukrainas prej disa kohësh ka ndjekur lëvizjet e forcave ruse duke përdorur AirPods-at e vjedhura nga shtëpia e tij në Kiev.
Vitaly Semenets tregoi për The Times of London se kufjet e tij me Bluetooth nga Apple u vodhën nga një ushtar rus nga shtëpia e tij. Disa kohë pasi ato u vodhën, Semenets u kujtua se ai mund të zbulonte vendndodhjen e tyre duke përdorur aplikacionin Find My të Apple.
Ndjekja e vendndodhjes zbuloi lëvizjet e forcave ruse ndërkohë që ato po tërhiqeshin nga plani fillestar për të sulmuar Kievin. Ato kaluan kufirin në Bjellorusi dhe më pas arritën në Belgorod, ku Rusia po grumbullon trupa për të nisur agresionin në regjionin lindor të Donbas.
Semenets publikoi një screenshot të vendndodhjes së AirPods të tij të vjedhura nga aplikacionin Find My në Instagram, duke bërë tag Apple dhe duke shkruajtur se “falë teknologjisë, unë e di se ku ndodhen AirPods-at e mi”.
Ky postim ka grumbulluar më tepër se 28,000 pëlqime. Kjo nuk është hera e parë që teknologjia e përditshme ka luajtur një rol në luftën në Ukrainë. Më herët Google Maps dhe Apple Maps po tregonin vendndodhjen e ushtrisë ruse. Nga ana tjetër forcat ukrainase kanë përdorur aplikacionet si Telegram për të siguruar informacione mbi forcat ruse.
