Gjithçka që duhet të dini rreth kartës eSIM

Secili prej nesh përdor aktualisht në celularin e tij një kartë SIM, e cila futet brenda në pajisje dhe i tregon asaj informacionet mbi numrin e telefonit që përdorni dhe kompaninë ofruese. Tashmë këto karta SIM do të bëhen dixhitale (eSIM) dhe do ta vendosin informacionin në një proçesor të riprogramueshëm të përfshirë brenda në pajisje.

Një ndër avantazhet e kartës eSIM është madhësia e saj. Ajo është një pjesë shumë e vogël, e cila mund të përfshihet dhe në pajisje të ndryshme si dronët, sensorët apo wearables, ku hapësira është e limituar.

Në smartphone, eSIM ju ofron më tepër fleksibilitet në menaxhimin e kartave që ju përdorni. Një eSIM i vetëm i instaluar në pajisje bën të mundur që ju të shtoni dhe një tjetër kartë në smartphone, duke krijuar një profil të ri. Ju mund të kaloni nga një profil në tjetrin vetëm përmes një butoni (siç bëjnë të gjithë përdoruesit aktual të smartphone-ve me 2 karta SIM fizike).

Megjithatë kjo lëvizje mund të ketë dhe një anë negative të vogël. Me eSIM, tashmë ju do ta keni pak më të vështirë përdorimin e një karte në pajisje të ndryshme, pasi ne jemi mësuar vetëm me lëvizjen fizike të kartës ndërmjet pajisjeve që duam të përdorim. Pra, në ndërrimin e kësaj karte, do të duhet të ndërhyjë dhe kompania ofruese sa herë të ndërroni pajisjen.

eSIM ka ekzistuar si opsion që në 2017 në smartphone-t Pixel dhe që në 2018 në iPhone. Megjithatë problemi kryesor i kësaj teknologjie është adoptimi i ngadaltë nga kompanitë operatore.

Per momentin, në Shqipëri e vetmja kompani që ofron shërbimin eSIM është Vodafone Albania.

Më poshtë gjeni një listë të smartphone-ve që mbështesin eSIM.