Një studim i ri ka arritur në përfundimin se aftësitë e prindërve në zgjidhjen e problemeve matematikore mund të ndikojnë tek fëmijët. Prandaj, prindërit që e urrejnë matematikën kanë fëmijë që kanë rezultate jo të mira në matematikë. Deri në 30% e njerëzve kanë ‘ankth matematikor‘ të rëndë, i cili mund të çojë në djersitje të pëllëmbëve, rritje të rrahjeve të zemrës apo probleme me stomakun.
Studiuesit analizuan ankthin që vjen nga problemat matematikore në 126 prindër dhe më pas gjurmuan aftësitë matematikore të fëmijëve të tyre. Ata zbuluan se në këto raste, fëmijët shënonin rezultate akoma më të dobëta në fushën e matematikës nga mosha 3-5 vjeç. Kjo sugjeron që ankthi i prindërve të tyre mund t’i shtyjë ata të luftojnë për të kuptuar matematikën për vitet në vijim.
Kur prindërit nuk e pëlqejnë matematikën, mund të ndodhë që të mos luajnë lojra me numra me fëmijët e tyre. Megjithatë autorët e studimit thonë se, edhe kur prindërit përpiqen të luajnë lojëra të tilla me fëmijët e tyre, ata mund të transmetojnë ndjenjat e tyre të pakënaqësisë për matematikën, ndoshta nga mungesa e entuziazmit. Kjo mund të zvogëlojë ose zhdukë përfitimet e aktivitetit.
Dr Kinga Morsanyi, autore e studimit nga Universiteti Loughborough, tha: “Një hap i thjeshtë por i fuqishëm që prindërit mund të ndërmarrin është të flasin më pozitivisht për matematikën dhe të kuptojnë se nuk keni nevojë për një talent të veçantë në matematikë për të qenë në gjendje ta mësoni atë. Edhe nëse prindërit nuk e pëlqejnë matematikën, shfaqja e interesit, entuziazmit dhe inkurajimit mund të bëjë një ndryshim të madh për fëmijët e tyre.”
Fëmijët që ishin më pak të aftë në matematikë përpara se të shkonin në shkollë ishin përgjithësisht më keq në matematikë në një test kur ishin tetë vjeç, duke përfshirë mbledhjen, zbritjen dhe tabelën e shumëzimit. Njerëzit që luftojnë me matematikën në fëmijëri kanë tendencë të kenë vështirësi në një moshë më të madhe dhe mund të jenë më të gabuar në marrjen e vendimeve financiare si rezultat, kanë zbuluar studimet e mëparshme.
