Seria e Google Pixel 8 pritet të lançohet më vonë gjatë këtij viti, dhe tashmë kemi siguruar dhe videon e parë të bërë leak nga ky smartphone. Leaker-i i njohur Kuba Wojciechowski ka publikuar një video të siguruar nga 91mobiles që na tregon dizajnin e ri të smartphone-it të ri flagship së bashku me termometrin e integruar në pjesën e pasme të tij.

Shërbimi i matjes së temperaturës trupore nga Google Pixel 8 do të vijë përmes një sensori të bardhë të integruar në ishullin e kamerave poshtë ndriçuesit LED. Ky është një termometër me rreze infra të kuqe mjaft i ngjashëm me atë që gjendet dhe në Honor Play 4 Pro dhe termometrat që nuk kanë nevojë për kontakt.

Video e publikuar na tregon pikërisht se si ky shërbim i ri për matjen e temperaturës trupore do të funksionojë. Si fillim ju duhet të largoni të gjithë aksesorët që keni, si përshembull syzet, dhe të afroni smartphone-in pranë ballit tuaj pa e prekur atë. Më pas ju do të lëvizni smartphone-in drejt veshit tuaj për një periudhë rreth 5 sekonda për të marrë një rezultat të saktë të temperaturës.

Pjesa tjetër e dizajnit duket e ngjashme, me kënde të rrumbullakosura, 3 kamera në pjesën e pasme (të cilat janë pozicionuar në një drejtim ndryshe nga paraardhësi). Së shpejti pritet të mësojmë më tepër informacione rreth këtij smartphone-i.