Agjencitë e zbatimit të ligjit në të gjithë botën vuajnë nga mosvërtetimi i deklaratave të dëshmitarëve okularë dhe mosgjetja e provave fizike në vendngjarje. Shpeshherë deklaratat e gabuara të dëshmitarëve okularë çojnë në arrestime të padrejta. Kevin Strickland u lirua pasi shpenzoi 42 vite në burg gabimisht pasi ishte dënuar për një vrasje të trefishtë në 1978, dhe identifikimi i tij u bë nga një dëshmitar okular.
Megjithatë Peter Rosenfeld ka zhvilluar një pajisje të quajtur Complex Trial Protocol, e cila konsiderohet si një metodë tepër e besueshme për analizmin e valëve specifike të trurit, P300.
Kjo teknikë jo e shtrenjtë dhe jo-invazive mund të përdoret për të zbuluar nëse një dëshmitar okular është i njohur me disa informacione tepër sekrete që kanë rënë në dorën e autoriteteve.
Si funksionon kjo pajisje?
P300 është një valë elektrike e trurit e zbulueshme duke vendosur elektroda në skalpin e një personi. Në elektroencefalogram ajo shfaqet me një zhvendosje pozitive ose negative 300-600 milisekonda pasi një person përballet me një stimul të konsiderueshëm. Ky reagim konsiderohet si një indeks i besueshëm i njohjes së kujtesës.
Pra pajisja mund të tregojë se kur një person njeh emrin e këtij individi, shijen e ëmbël të çokollatave apo zërin e një artisti. Investiguesit e përdorin këtë pajisje për të analizuar aktivitetin elektrik të trurit të personit që po intervistohet, duke prezantuar informacione tepër të rëndësishmë së bashku me disa informacione neutrale (te parëndësishme) dhe duke parë reagimin e tyre.
