Meta ka prezantuar Muse Spark 1.1, versionin më të ri të modelit të saj të inteligjencës artificiale, i cili është projektuar për programim dhe agjentë autonomë. Kompania e cilëson atë si modelin më të avancuar që ka zhvilluar deri më tani për kodim, ndërsa synon të konkurrojë më fort me OpenAI, Anthropic dhe Google në garën e inteligjencës artificiale.
Ndryshe nga versioni i parë i prezantuar në prill, i cili ishte i disponueshëm vetëm për një grup të kufizuar partnerësh, Muse Spark 1.1 do të ofrohet përmes portalit të zhvilluesve të Meta në formën e një “public preview”. Fillimisht, zhvilluesit do të regjistrohen në një listë pritjeje, ndërsa qasja do të zgjerohet gradualisht.
Sipas drejtuesit të Meta Superintelligence Labs, Alexandr Wang, modeli është optimizuar për të bashkëpunuar me mjetet më të përdorura të programimit dhe platformat e zhvillimit, duke e bërë atë ideal për krijimin e agjentëve AI që mund të kryejnë detyra komplekse në mënyrë autonome.
Meta po e shoqëron lançimin edhe me një strategji agresive çmimesh. Çdo llogari e re API do të përfitojë 20 dollarë kredit falas, ndërsa përdorimi do të kushtojë 1.25 dollarë për një milion token hyrës dhe 4.25 dollarë për një milion tokenë dalës, çmime që kompania i konsideron më konkurruese se ato të rivalëve.
Prezantimi vjen vetëm pak ditë pasi Meta prezantoi edhe Muse Image, modelin e ri për gjenerimin e imazheve me AI. Wang zbuloi gjithashtu se Meta është duke trajnuar një model edhe më të fuqishëm, me emrin e koduar Watermelon, ndërsa konfirmoi se kompania vazhdon të punojë edhe mbi versione open-source të familjes Muse, megjithëse pa një datë konkrete publikimi.
