Qoftë duke ecur në park, duke folur në telefon apo thjesht duke u endur pa qëllim, shumica e njerëzve bëjnë të njëjtën gjë pa e kuptuar, kthehen instinktivisht majtas. Sipas një studimi të ri shkencor, njerëzit kanë një prirje të lindur për të lëvizur në drejtim kundër akrepave të orës, një sjellje që shfaqet pavarësisht moshës, kulturës apo edhe pranisë së të tjerëve.
Hulumtimi është realizuar nga studiues të University of Navarra dhe është publikuar në revistën prestigjioze Nature Communications. Sipas autorëve, rezultatet janë jashtëzakonisht konsistente. Pavarësisht madhësisë së turmës, kufijve fizikë apo karakteristikave personale si dora dominuese apo preferenca për t’u kthyer djathtas, lëvizja kundër akrepave të orës shfaqet vazhdimisht.
Për studimin u zhvilluan një sërë eksperimentesh me qindra pjesëmarrës në Spanjë dhe Japoni. Vullnetarët u ftuan të ecnin lirshëm në ambiente të ndryshme, nga hapësira rrethore dhe zona të hapura, deri te teste ku ecën plotësisht vetem, ndërsa lëvizjet e tyre u monitoruan nga kamera dhe dronë. Analiza tregoi se pjesëmarrësit lëviznin pothuajse gjithmonë në drejtim kundër akrepave të orës, edhe kur nuk kishte askënd tjetër për t’u ndjekur apo shmangur.
Një element surprizues ishte fakti se, kur u pyetën se në cilin drejtim mendonin se do të ecnin njerëzit e tjerë, shumica u përgjigjën gabim, duke përmendur drejtimin orar. Kjo tregon se prirja është e pavetëdijshme dhe jo një zgjedhje e menduar.
Sjellja u vu re edhe te fëmijët shumë të vegjël. Në lojëra të lira në kopshte, fëmijët rreth pesë vjeç formonin pothuajse spontanisht modele lëvizjeje kundër akrepave të orës, duke sugjeruar se ky instinkt zhvillohet shumë herët në jetë.
Arsyeja e saktë pse njerëzit “favorizojnë të majtën” mbetet ende mister. Studiuesit spekulojnë se asimetri të vogla neurologjike apo biologjike mund të ndikojnë mënyrën se si lëvizim. Fenomene të ngjashme janë vërejtur edhe te kafshët, si peshqit, bretkosat apo milingonat.
Zbulimi nuk është vetëm kuriozitet shkencor. Ai mund të ndikojë realisht në mënyrën se si projektohen stadiumet, muzetë, aeroportet apo qendrat tregtare, duke sugjeruar se qarkullimi kundër akrepave të orës mund ta bëjë lëvizjen e njerëzve më natyrale dhe më komode.
