Qeveria spanjolle ka miratuar një reformë të rëndësishme në Rregulloren e Përgjithshme të Trafikut, duke vendosur rregulla më të forta për përdoruesit e skuterëve elektrikë dhe mjeteve të tjera të lëvizshmërisë personale. Masa më e diskutuar ishte përdorimi i helmetës, i cili bëhet i detyrueshëm në të gjithë territorin dhe vendoset një moshë minimale prej 15 vjeç për të hipur në e-scooter. Reforma është pjesë e një pakete më të gjerë për sigurinë rrugore, e udhëhequr nga Ministria e Brendshme dhe Direktorati i Përgjithshëm i Trafikut (DGT).
Sipas autoriteteve, objektivi kryesor është mbrojtja e përdoruesve më të rrezikuar të rrugës, këmbësorëve, çiklistëve, motoçiklistëve dhe drejtuesve të skuterëve, në një realitet urban që ka ndryshuar ndjeshëm gjatë 20 viteve të fundit. Përveç helmetës, drejtuesit e e-scooterëve do të jenë të detyruar të mbajnë dritat ndezur në kushte shikueshmërie të ulët dhe gjatë natës, si dhe të përdorin elementë reflektues. Shkelja e këtyre rregullave mund të ndëshkohet me gjobë deri në 200 euro.
Një nga risitë kryesore të reformës është standardizimi i rregullave në nivel kombëtar. Deri më sot, çështje si mosha minimale apo helmetat rregulloheshin nga bashkitë, duke krijuar një mozaik ligjesh që ndryshonin nga qyteti në qytet. Me këtë ndërhyrje, qeveria synon të vendosë një kuadër të unifikuar, duke iu përgjigjur rritjes së shpejtë të përdorimit të këtyre mjeteve dhe shqetësimeve për aksidentet.
Ndryshimet nuk ndalen vetëm te skuterët. Motoçiklistët do të duhet të përdorin doreza mbrojtëse dhe këpucë të mbyllura, ndërsa rregullat për parakalimin e çiklistëve bëhen më strikte. Shoferët do të detyrohen të ulin shpejtësinë dhe, kur është e mundur, të kalojnë plotësisht në korsinë ngjitur. Paketa përfshin edhe masa të reja për situata emergjente, bllokime trafiku dhe reshje bore, me krijimin e korridoreve për shërbimet e emergjencës.
Shumica e masave do të hyjnë në fuqi më 1 tetor 2026, ndërsa disa detyrime si elementët reflektues për e-scooterët dhe dorezat e certifikuara për motoçiklistët në rrugë ndërqytetëse do të shtyhen deri në tetor 2027, për t’i dhënë kohë qytetarëve të përshtaten me rregullat e reja.
