A jeni gati për një tjetër event ndërkombëtar?
Pas eventeve gjigande të teknologjisë si IFA 2024 në Berlin, si dhe Gitex Global 2024 në Dubai, jemi gati të vizitojmë qytetin e Helsinkit në Finlandë për një event të dedikuar ndaj startups.
Ne jemi tepër të gëzuar të njoftojmë se Geek Room do të jetë pjesë e Slush 2024 në datat 20-21 nëntor për të ndjekur nga afër performancën në shkallë botërore të startup-eve shqiptarë të përzgjedhur gjatë Slush’D Tirana, Patoko dhe Bliss.
Prezenca jonë në këtë event për të dokumentar me detaje rrugëtimin e startup-eve shqiptare në Slush 2024 është e mbështetur nga Protik, një organizatë jofitimprurëse shqiptare, misioni i së cilës është të promovojë zhvillimin e sektorit të TIK në Shqipëri. Qendra është krijuar me kontributin e qeverisë shqiptare, USAID-it, Fondacionit Shqiptaro-Amerikan për Zhvillim, Microsoft, Cisco.
Çfarë është Slush 2024?
Slush është një event tepër i veçantë i cili ka një mision thelbësor për të ndihmuar dhe krijuar themelues të rinj që do të ndryshojnë botën me idetë e tyre inovative. Me qendër në Helsinki, Slush organizon çdo vit eventin më të rëndësishëm të startup-eve në botë duke bashkuar një grup të përzgjedhur startup-esh evropiane, investitorë të klasit botëror dhe gazetarë të teknologjisë.
Këtë vit, Slush 2024 përgjithësisht përqendrohet në disa fusha kryesore:
- Aksesi i zgjeruar i investitorëve
- Mentorimi
- Qëndrueshmëria
- Gjithëpërfshirja
Këtë vit, Slush ka zgjedhur “Metamorfozën” si temë – përfundimisht një zgjedhje e përshtatshme për një industri të përcaktuar nga ndryshimi i vazhdueshëm. Në frymën e transformimit, Slush 2024 synon të eksplorojë se si startup-et mund të përshtaten, evoluojnë dhe lulëzojnë në peizazhin e sotëm të teknologjisë me ritme të shpejta.
Programi i Slush padiskutim ndjek tendencat më të fundit të teknologjisë, me diskutimet e këtij viti që zhyten në AI, machine-learning dhe teknologjinë klimatike. Në vitin 2023, investimet në AI dhe teknologjinë klimatike morën një pjesë të konsiderueshme të kapitalit në teknologjinë evropiane, me kompanitë e AI që kapën 11% dhe teknologjinë klimatike 27%.
Në një shtytje të fortë drejt qëndrueshmërisë, Slush 2024 prezanton iniciativa të reja të gjelbra. Nga një partneritet me Supercritical për të kompensuar plotësisht gjurmën e karbonit të këtij eventi, janë prezent 35 stacione riciklimi me staf, duke treguar se eventi ka prioritet minimizimin e ndikimit të saj mjedisor. Aino Bergius, CEO i Slush, sjell përkushtimin e Slush ndaj diversitetit dhe përfshirjes, veçanërisht duke vënë në dukje ndikimin e mbi 1,500 vullnetarëve që ndihmojnë në krijimin e një mjedisi gjithëpërfshirës.
Patoko
Fillimisht Patoko u krijua si një aplikacion për të lehtësuar lëvizshmërisë urbane të klientëve, fillimisht nëpërmjet taksive. Megjithatë tashmë Patoko është transformuar në një super-aplikacion, duke ofruar disa shërbime të ndryshme në një hapësirë të vetme.
Nëpërmjet këtij aplikacioni ju mund të shikoni një kosto të përafërt të udhëtimit tuaj me taksi, të gjuromoni vendodhjen reale të autobuzëve në Tiranë tërësisht falas, si dhe të kryeni pagesa apo të përfitoni kupona dhe dhurata duke përdorur shërbimet e aplikacionit.
Bliss
Bliss është platforma e parë në Shqipëri që sjell një inovacion në kujdesin e shëndetit mendor, duke ofruar seanca terapie online.
Duke kombinuar teknologjinë me ekspertizën e psikologëve të kualifikuar, Bliss mundëson seanca terapie online, duke hequr barrierat gjeografike dhe sociale që tradicionalisht kanë kufizuar aksesin në shërbime të shëndetit mendor. Seancat zgjasin 50 minuta dhe mund të zhvillohen nga çdo pajisje me kamera dhe internet.
