Geoffrey Hinton, “kumbarai i AI”, thotë se ka ardhur koha që Google të rimarrë kryesimin në garën e inteligjencës artificiale, dhe sipas tij, kjo po ndodh tashmë. Në një intervistë për Business Insider, Hinton u shpreh se është “më befasuese që Google pati nevojë për kaq shumë kohë” për të kaluar OpenAI, duke vlerësuar suksesin e fundit të gjigantit të kërkimit me prezantimin e Gemini 3 dhe modelit të ri të gjenerimit të imazheve Nano Banana Pro, të cilët shumë ekspertë i konsiderojnë më të avancuar se GPT-5.
Pas tre vitesh nga “kod i kuq” i brendshëm që Google shpalli pas prezantimit të ChatGPT, tani raportimet flasin se është OpenAI ajo që po bie në alarm. Rritja e aksioneve të Google falë thashethemeve për një marrëveshje miliarda dollarëshe me Meta për furnizim me çipet e saj e forcon më tej pozicionin. Hinton vlerëson se prodhimi i çipeve është “avantazh i madh”, së bashku me ekipet e fuqishme të kërkimit, sasinë e madhe të të dhënave dhe infrastrukturën e fuqishme të qendrave të të dhënave.
“Mendoj se Google do të fitojë”, thotë ai.
Ai kujtoi se Google ishte për shumë vite lider në AI, kompania kishte chatbot-ë të mëdhenj para të tjerëve, por u tregua e kujdesshme, sidomos pas dështimit të chatbot-it “Tay” të Microsoft në vitin 2016. Sundar Pichai ka pranuar se Google vonoi qëllimisht prezantimin e teknologjive të reja derisa të ishin mjaftueshëm të sigurta dhe të besueshme.
Megjithatë, Google ka pasur edhe probleme, si çështjet me gjeneruesin e imazheve vitin e kaluar dhe përgjigjet absurde të AI Search. Në këtë atmosferë rikthimi, kompania shpalli edhe një donacion prej 10 milionë dollarësh kanadezë për Universitetin e Torontos, për të krijuar katedrën “Hinton Chair in AI”, që do të nderojë kontributin e fituesit të Nobelit.
Hinton, i cili la Google në 2023 për shkak të shqetësimeve etike, vazhdon të paralajmërojë për rreziqet e AI, që nga humbja e vendeve të punës te rreziku që sistemet inteligjente të tejkalojnë kontrollin njerëzor.
