2023 ishte viti më i nxehtë i Evropës në histori – dhe kjo ndodhi kryesisht falë ndryshimeve klimatike, thonë ekspertët. Temperatura e përgjithshme e Evropës vitin e kaluar ishte 1°C mbi mesataren, ka zbuluar programi i BE-së për ndryshimet klimatike – duke e vendosur atë në të njëjtin nivel me vitin 2020.
Në mënyrë shqetësuese, temperaturat në kontinent ishin më të larta se mesatarja për 11 muajt e vitit, duke përfshirë shtatorin më të ngrohtë të regjistruar. Viti 2023 pa një numër rekord ditësh me ‘stres ekstrem të nxehtësisë’, ku temperatura ishin aq të larta sa ndikuan në mirëqenien njerëzore. Ekspertët paralajmërojnë se Evropa është ‘kontinenti me ngrohjen më të shpejtë’ në botë, ku temperaturat po rriten me rreth dyfishin e normës mesatare globale, duke shkaktuar zjarre, thatësira dhe ngjarje më ekstreme të motit.
“Në vitin 2023, Evropa dëshmoi zjarrin më të madh të regjistruar ndonjëherë, një nga vitet më të lagështa, valë të nxehta detare dhe përmbytje të përhapura shkatërruese”, tha Carlo Buontempo, drejtor i C3S.
“Temperaturat vazhdojnë të rriten, duke i bërë të dhënat tona gjithnjë e më jetike në përgatitjen për ndikimet e ndryshimeve klimatike.” Celeste Saulo, sekretare e përgjithshme në Organizatën Botërore Meteorologjike, e drejtoi gishtin drejt emetimeve të gazeve serrë. “Kriza klimatike është sfida më e madhe e brezit tonë,” tha ajo. “Kostoja e veprimit klimatik mund të duket e lartë, por kostoja e mosveprimit është shumë më e lartë. Siç tregon ky raport, ne duhet të shfrytëzojmë shkencën për të ofruar zgjidhje për të mirën e shoqërisë.”
