Google pritet të prezantojë serinë Pixel 10 në eventin Made by Google më 13 gusht, ndërsa pajisjet pritet të dalin në shitje një javë më pas, më 20 gusht. Ky informacion u zbulua fillimisht nga @MysteryLupin dhe më pas u konfirmua nga Android Headlines, që shtoi edhe datën e daljes në treg.
Seria Pixel 10 do të përfshijë 4 modele: Pixel 10, Pixel 10 Pro, Pixel 10 Pro XL dhe Pixel 10 Pro Fold. Kjo është hera e parë që Google prezanton kaq shumë variante njëkohësisht. Gjithashtu pritet të prezantohet edhe Pixel Watch 4.
Sipas rrjedhjeve, Pixel 10 standard do të ketë për herë të parë tre kamera, duke shtuar një lente telefoto, megjithëse me disa kompromise në cilësinë e sensorëve. Modelet Pro dhe Fold nuk do të ndryshojnë shumë nga jashtë krahasuar me serinë Pixel 9, por do të pajisen me çipin e ri Tensor G5, që ofron performancë më të mirë, efikasitet energjetik dhe veçori të avancuara me AI, veçanërisht integrimin me Gemini AI.
Pixel Watch 4 do të jetë më i trashë se paraardhësi, ndoshta për të përfshirë një bateri më të madhe. Rrjedhjet flasin për teknologji të re karikimi dhe disa butona të rinj. Do të jetë gjithashtu ora e parë inteligjente që mbështet Gemini AI. Të gjitha pajisjet e reja do të përdorin ndërfaqen vizuale Material 3 Expressive të Google.
Vitin e kaluar, seria Pixel 9 u prezantua po më 13 gusht, por pati vonesa në shitje – veçanërisht për modelin Fold. Këtë vit, Google duket se synon një lançim më të shpejtë dhe të sinkronizuar.
