Nga Vito Corleone në The Godfather tek Sophia Loren në Yesterday, Today and Tomorrow, personazhet italianë shpesh shikohen duke përdorur gjeste të ndryshme të duarve ndërkohë që flasin. Tani, një studim ka konfirmuar se ky fenomen është i vërtetë dhe në botën reale.
Shkencëtarët nga Universiteti Lund studiuan gjestet e njerëzve nga Italia dhe Suedia teksa flisnin. Ata zbuluan se italianët përdorin më shumë se 40 gjeste dore në minutë kur flasin – dyfishi i asaj që bën një suedez mesatar. Studiuesit në Universitetin Lund në Suedi morën 12 italianë dhe 12 suedezë për t’i ritreguar historinë e një klipi 90 sekondash nga Pingu një miku që nuk e kishte parë filmin vizatimor. Ata zbuluan se italianët përdornin 22 gjeste për 100 fjalë, krahasuar me 11 të bëra nga subjektet suedeze.
Studimet e mëparshme kanë zbuluar se italianët flasin rreth 188 fjalë në minutë, që do të përfshinte 41 gjeste. Dr Maria Graziano tha: “Italianët bëjnë më shumë gjeste me duart ndërkohë që flasin se suedezët, gjë që pritej. Më interesant ishte fakti se ne demonstruam se njerëzit nga kultura të ndryshme përdorin gjeste ndryshe, për shkak të stileve të ndryshme retorike dhe mënyrave të ndryshme të ndërtimit të një historie.”
Përveç shpeshtësisë së përdorimit të gjesteve, studiuesit shikuan pse gjestet po përdoreshin gjatë bisedës. Dr Graziano tha: ‘Kur tregojmë histori, ne kombinojmë disa lloje informacioni: ne prezantojmë personazhet dhe ngjarjet, përshkruajmë veprimet dhe shpjegojmë pse diçka ndodh. Ne kontrollojmë që dëgjuesi ynë të kuptojë atë që po themi. Dhe nëse tregojmë një histori të bazuar në film vizatimor, i referohemi edhe aktit të shikimit.”
Studimi zbuloi se italianët prireshin të përdornin gjeste më pragmatike – ato që komentojnë historinë dhe prezantojnë pjesë të reja te dëgjuesi. Ndërkohë, suedezët prireshin të përdornin më shumë gjeste përfaqësuese, të cilat më së shumti demonstrojnë ngjarjet dhe veprimet e tregimit.
