Shpesh mendohet se lavamani mund të jetë një nga pikat më të pastra në shtëpi. Por një studim i ri mund t’ju bëjë të pastroni lavamanin tuaj më shpesh tani e tutje.
Studiuesit nga Universiteti Flinders kanë paralajmëruar se lavamanët janë ndër vendet më të pasura me mikrobe të rrezikshme, duke përfshirë këtu dhe shkaktarët e sëmundjeve të tilla si pneumonia, apo infeksione të ndryshme. Për fat të keq lavamani nuk është i vetmi vend i mbushur me baktere, pasi një studim tjetër vërtetoi praninë e baktereve rezistente ndaj rrezatimit të mikrovalëve që përdorim për të ngrohur ushqimin.
Për të arritur në këtë përfundim, studiuesit analizuan ‘biofilmet’ brenda lavamanëve të vendosur si në spitale ashtu edhe në shtëpi banimi. Një biofilm është substancë që gjendet në kanalet e kanalizimeve dhe rreth rubinetit të lavamanit. Analiza e tyre zbuloi mikrobe që jetojnë brenda biofilmave që mund të shkaktojnë pneumoni dhe infeksione të ndryshme.
“Në të dy mjediset ne gjetëm një bollëk të lartë të mikrobeve patogjene, duke përfshirë disa që zakonisht nuk janë të pranishëm në ujë,” tha Claire Hayward, autorja kryesore e studimit. Studiuesit sugjerojnë se këta patogjenë ka të ngjarë të transferohen në biofilm nga njerëzit që përdorin lavamanin për larjen e duarve, nga furnizimi me ujë ose nëpërmjet mbetjeve biologjike.
Ndërsa mund të mendoni se lavamanët në spitale do të strehonin më shumë mikrobe, çuditërisht nuk ishte kështu. “Kishte gjithashtu një numër më të madh të baktereve Legionella të pranishme në mostrat e marra nga banesat në krahasim me ato të marra nga spitalet.”
Lavamanët e spitalit ka të ngjarë të pastrohen më shpesh dhe më mirë sesa lavamanët në shtëpi, sipas ekipit.
