Një youtuber vendosi që të krijonte një video të re ku largohet me qëllim nga një avion dhe e lë atë të përplaset në tokë. Ai mendonte se duke e bërë një gjë të tillë do të rriste shikueshmërinë e videove në kanalin e tij të YouTube, mirëpo tashmë ai rrezikon të dënohet me deri në 20 vite burgim.
Kjo video me titullin “I crashed my airplane” nga Trevor Jacob ka arritur deri më tani 3 milionë shikime. Si fillim dukej sikur avioni kishte disa probleme me motorin e tij, dhe 29 vjeçari vendos të hidhet nga avioni i tij me një selfie stick në dorë dhe parashutën e tij në kurriz.
Kamerat e vendosura përreth këtij avioni privat tregojnë se si ai lëviz pa asnjë kontroll dhe në fund përplaset në tokë. Nga ky moment Jacob filmon veten e tij duke shkuar në vendin e përplasjes, ndërkohë që zbulon se nuk ka ujë me vete.
Shikuesit në YouTube ndjekin lëvizjet e tij përmes bimëve helmuese dhe mënyrave se si ai nis të ngjitet në kodra, duke treguar vazhdimisht se sa i etur dhe sa i humbur ndihet. Më pas ai arrin të gjejë një burim uji, dhe disa momente më vonë një makinë shfaqet para tij për ta shpëtuar.
Disa javë pas aksidentit, Federal Aviation Administration nisi të hetonte këtë përplasje, megjithatë Jacob kishte grumbulluar të gjitha mbetjet e avionit të përplasur, i kishte prerë ato në copëza të vogla dhe i kishte shpërndarë në kosha të ndryshëm mbeturinash. Dhe pamjet filmike të siguruara nga kamerat në avion ishin fshirë.
Prandaj FAA i hoqi liçensën e pilotit Jacob në prill të 2022. Më pas përmes një marrëveshje me forcat ligjzbatuese, FAA arriti në përfundimin se Jacob i kishte kryer shkelje të ndryshme të ligjit, për të cilat mund të dënohet deri në 20 vite në burg.
