Përmes përmirësimit më të fundit, WhatsApp do të bëjë të mundur për të gjithë përdoruesit e kësaj platforme që të mos shqetësohen nga numrat e panjohur.
Shërbimi i quajtur “Silence unknown callers” ka të njejtin funksion si vetë emri, pra bën që telefonatat nga numrat e panjohur të mos shfaqen në kohë reale, por vetëm të regjistrohen në listën e telefonatave, në rast se ju dëshironi t’i telefononi më vonë.
Gjithashtu për sa i përket privatësisë, WhatsApp prezantoi një tjetër shërbim të quajtur “Privacy Checkup”.
“Nëse ju zgjidhni Start checkup në Privacy Settings do të përballeni me disa shtresa ekstra privatësie që do të përforcojnë sigurinë e mesazheve tuaja, telefonatave dhe informacioneve personale.” tregon kompania. Nëpërmjet këtij shërbimi ju mund të zgjidhni personat të cilët mund t’ju telefonojnë apo të kontrollojnë informacionet tuaja personale, si dhe të shtoni më tepër privatësi në bisedat apo adresën tuaj.
Për të reklamuar akoma më tepër privatësinë e bisedave në WhatsApp, kompania ka publikuar një video emocionale që nxit të gjithë përdoruesit të komunikojnë me miqtë e tyre të cilët mund të jenë duke klauar një periudhë të vështirë. “Hey, po mendoja për ty. Unë jam këtu nëse ke nevojë të bisedosh. Askush nuk do t’i shikojë këto mesazhe përveç nesh. Dhe ti mund të aktivizosh disappearing mode ose të përdorësh shërbimin e kyçjes së chat-it.” tregohet në video.
