Spencer Cox, guvernatori i Utah, ka firmosur ligje të reja të cilat detyrojnë të gjithë personat nën 18 vjeç të marrin leje nga prindërit e tyre për të përdorur platforma si TikTok, Instagram apo Facebook. Një tjetër projektligj i firmosur ndalon gjithashtu kompanitë e rrjeteve sociale që të përfshijnë shërbime të cilat mund të shkaktojnë varësinë e minorenëve ndaj këtyre platformave.
Këto ishin ligjet e para në SHBA të cilat kanë si qëllim ndalimin e përdorimit të rrjeteve sociale nga të miturit pa lejen e prindërve të tyre. “Ne nuk do të lejojmë rrjetet sociale që të dëmtojnë shëndetin mendor të rinisë.” tha Cox në një mesazh të publikuar në Twitter.
Check out https://t.co/GVAcSi9zHx, our new website where you can learn more about the new… pic.twitter.com/zz5dRkdKVn
— Utah Gov. Spencer J. Cox (@GovCox) March 24, 2023
Impakti i rrjeteve sociale tek fëmijët është një temë diskutimi shumë e nxehtë në SHBA, por jo vetëm. Gjatë kohës kur Cox firmosi dy ligjet e reja, CEO i TikTok ishte duke dëshmuar para Kongresit për të shpjeguar shqetësimet në lidhje me sigurinë kombëtare, privatësinë e të dhënave si dhe shëndetin mendor të përdoruesve nën 18 vjeç.
Në ligjin e ri përshkruhet se minorenët nuk do të mund të aksesojnë rrjetet sociale pa marrë më parë leje nga prindërit. Prindërit gjithashtu do të kenë mundësinë të aksesojnë të gjitha postimet e fëmijëve të tyre. Platformat sociale do të bllokojnë aksesin e minorenëve nga ora 22:30 deri në 6:30, një orar që mund të ndryshohet vetëm nga prindërit.
Për më tepër, rrjetet sociale do ta kenë të ndaluar të reklamimin, mbledhjen e informacioneve rreth minorenëve apo rritjen e shikueshmërisë së videove specifike.
Ligjet e sapofirmosura do të hyjnë në fuqi në muajin mars të vitit të ardhshëm.
