Që të gjithëve na ka ndodhur të hapim Instagram dhe të shikojmë një video interesante për pak sekonda, para se ajo të zhduket përgjithmonë nga rifreskimi që i bëhet përmbajtjes. Pas raportimeve të shumta nga ana e përdoruesve të aplikacionit, duket se kjo gjë do të ndryshojë.
Ishte vetë drejtuesi i Instagram, Adam Mosseri, i cili përmes një postimi në Story bëri të ditur se aplikacioni do të presë deri sa ju t’i bëni vetë swipe videos për të shfaqur përmbajtjen e re të rifreskuar.
Kjo sjellje – të cilën punonjësit e Instagram e njihnin me emrin “rug pull” – nuk ishte thjesht një gabim i çuditshëm. Mosseri thotë se aplikacioni e bëri atë “sepse ne po përpiqeshim të ngarkonim përmbajtje të re dhe po kërkonte pak kohë, kështu që vendosëm të shfaqnim diçka që ishte shkarkuar ndërkohë që shkarkohej përmbajtja e re“.
Por ai e pranoi se kjo gjë është me të vërtetë e bezdisshme, “kështu që ne e ndaluam së bëri atë“. Sipas Mosseri, kompania ka pranuar të ketë disa sakrifica në engagement për të ofruar një eksperiencë sa më të mirë për përdoruesit.
