Platforma WhatsApp e Meta ka një dobësi në siguri që thuhet se i lejon qeveritë të zbulojnë se me kë po komunikoni. Inxhinierët e paralajmëruan Metën për këtë dobësi të WhatsApp, duke thënë se kombet e ndryshme mund të monitorojnë bisedat.
Sipas një raporti nga The Intercept bëhet e ditur se ekipi i sigurisë lëshoi një paralajmërim të brendshëm për kolegët. Dobësia bazohet në “analizën e trafikut“, një teknikë e monitorimit të rrjetit disa dekada e vjetër që mbështetet në kontrollimin e trafikut të internetit në një shkallë masive kombëtare.
Dokumenti e bën të qartë se WhatsApp nuk është e vetmja platformë komunikimi e prekur nga ky fenomen. Por kjo bën që Meta të marrë një vendim të shpejtë nëse do t’i japë përparësi funksionalitetit të aplikacionit të tij të bisedës apo sigurinë e një segmenti të vogël por të cenueshëm të përdoruesve të tij.
Personeli i WhatsApp ka spekuluar se Izraeli mund të jetë duke e shfrytëzuar këtë dobësi si pjesë e programit të tij për të monitoruar palestinezët në një kohë kur mbikëqyrja dixhitale po ndihmon në vendosjen e shënjestrave në të gjithë Rripin e Gazës.
Megjithatë zëdhënësja e kompanisë Christina LoNigro tha: “WhatsApp nuk ka prova të dobësive të sigurisë në mënyrën se si funksionon platforma.”
LoNigro tha se dokumenti “nuk është një reflektim i një dobësie në WhatsApp“, vetëm “teorik” dhe jo unik për WhatsApp. LoNigro nuk u përgjigj kur u pyet nëse kompania kishte hetuar nëse Izraeli po e shfrytëzonte këtë dobësi.
