Tashmë gjithçka u zyrtarizua; TikTok nuk do të mund të aksesohet më nga përdoruesit shqiptarë duke filluar nga data 13 mars. Kjo gjë u bë e ditur përmes një deklarate nga Autoriteti Kombëtar për Sigurinë Kibernetike, e cila ka kërkuar marrjen e masave nga kompanitë e internetit që operojnë në vend për të ndaluar aksesimin e TikTok.
Autoriteti Kombëtar për Sigurinë Kibernetike (AKSK) me shkresën nr. 1196 prot., datë 10.03.2025 (administruar në AKEP me nr. 359/2 prot., datë 10.03.2025), ka kërkuar marrjen e masave të nevojshme për bllokimin e aksesit në aplikacionin TIK TOK dhe infrastrukturën e tij digjitale në territorin shqiptar, duke ndërmarrë veprimet e mëposhtme:
Bllokimi i IP-ve të TikTok në territorin e Shqipërisë.
Bllokimi i DNS-ve te TikTok në territorin e Shqipërisë.
Bllokimi i SNI (Server Name Indications) të TikTok në territorin e Shqipërisë.
Bllokimi i IP-ve të kompanisë ByteDance në territorin e Shqipërisë.
Ky njoftim vjen disa ditë pasi vendimi për mbylljen e TikTok u komunikua nga ministrja e arsimit, Ogerta Manastirliu si pjesë e Planit të ri të Veprimit në Shkolla. Diskutimet për mbylljen e platformës nisën pas vrasjes tragjike të 14 vjeçarit Martin Cani pasi një sherri që nisi në rrjetet sociale, jo në TikTok por në Snapchat.
Megjithatë, kryeministri Rama gjatë prezantimit të Planit të ri të Veprimit në Shkolla tha se versioni ndërkombëtar i TikTok është shumë ndryshe nga ai kinez, pasi në versionin ndërkombëtar promovohen “rrugaçërira, perversitet, dhunë, bullizëm, thika, shpata, revole” ndërkohë që versioni kinez “i mëson përdoruesit si të bëjnë mirë mësimet, si të ruhet natyra, se si është tradita”.
Qytetarët ndajnë mendime të ndryshme rreth këtij vendimi, ka disa prej tyre që e mbështesin, ndërkohë që shumë të tjerë janë kundër këtij vendimi, pasi mendojnë se bllokimi i një rrjeti social nuk është zgjidhja e këtij problemi madhor në ditët e sotme.
Nga ana tjetër, shumë qytetarë dhe politikanë mendojnë se marrja e një vendimi të tillë është bërë për të ndikuar në fushatën zgjedhore të partive të ndryshme, me zgjedhjet parlamentare që janë vetëm disa javë larg.
Geek Room kontaktoi më herët me zëdhënës të TikTok, të cilët treguan se kanë bërë përmirësime në moderimin e përmbajtjeve në platformë, madje duke punësuar moderatorë që flasin gjuhën shqipe.
