Shitjet e kompjuterave Mac nga Apple kanë rënë se 40.5% gjatë tremujorit të parë të vitit 2023, në krahasim me të njejtën periudhë një vit më parë.
Një trend i tillë mund të vihet re në të gjithë prodhuesit e mëdhenj të kompjuterave si Apple, ASUS, Dell, HP apo Lenovo, megjithatë pajisjet e Apple panë rënien më të madhe në treg. Dhe përqindja e tregut botëror të PC të kontrolluar nga Apple ka rënë nga 8.6% që ishte në 3-mujorin e parë të vitit 2022 në 7.2%, sipas të dhënave të grumbulluara nga IDC.
Sigurisht një gjë e tillë nuk ishte e paparashikuar. CFO i Apple, Luca Maestri tha në muajin shkurt se kompania priste një rënie të tillë në shitjen e Mac dhe iPads akoma dhe më herët. Në dhjetor të vitit të kaluar shitjet kishin rënë me 28.66%.
“Këto rezultate vijnë pasi ne u përballëm me periudhën e pandemisë gjatë viteve të kaluara, një periudhë që nxiti shumë kërkesën për kompjutera. Tashmë ne po rikthehemi në situatën normale para pandemisë.” tregon IDC. Kompania tregon se prodhuesit e kompjuterave do të “vuajnë” përgjatë këtij viti, megjithatë pritet që në vitin pasardhës kërkesat për këto pajisje elektronike të rriten sërisht.
Kjo hapësirë frymëmarrje për të gjithë kompanitë mund të shfrytëzohet mjaft mirë, sidomos nga Apple që dëshiron të shtyjë furnizuesit për zhvendosjen e biznesit të tyre nga Kina për në Indi.
