Një nga kompanitë më të mëdha globale në fushën e blockchain dhe aseteve dixhitale, Ripple, po hyn zyrtarisht në Evropën Juglindore dhe Shqipëri përmes T-Blocks, një kompani që ajo mbështet për të tokenizuar asetet e botës reale (RWA) si pasuritë e paluajtshme dhe energjinë e rinovueshme drejtpërdrejt në blockchain-in XRP Ledger (XRPL).
T-Blocks, një startup me origjinë shqiptare dhe seli në Luksemburg, është platforma e parë dixhitale e investimeve në rajon që lidh investitorët globalë me projekte të përzgjedhura dhe të certifikuara me standarde institucionale në sektorët e pasurive të paluajtshme, turizmit dhe energjisë së gjelbër. Gjatë viteve të fundit, kompania ka ndërtuar një infrastrukturë të plotë investimi, që përfshin struktura fondesh në Luksemburg, një platformë dixhitale, si dhe
partneritete me banka dhe rrjete shpërndarjeje ndërkombëtare, për të ndihmuar në mbylljen e hendekut të kapitalit në Ballkanin Perëndimor.
Eni Shtini, bashkëthemelues i T-Blocks deklaroi: “Shqipëria dhe Evropa Juglindore përfaqësojnë një nga rajonet e fundit të pashfrytëzuara të Mesdheut, me miliarda dollarë potencial në pasuritë e paluajtshme dhe energjinë e rinovueshme. Duke u bazuar në ekosistemin XRPL, ne po sjellim këto mundësi ekskluzive për t’u ofruar investitorëve globalë një portë dixhitale në tregje që deri më tani kanë qenë të paarritshme.”
Më herët këtë vit, T-Blocks u përzgjodh si pjesë e kohortës së parë të startup-eve që u diplomuan nga Plug and Play, akseleratori më i madh i kapitalit sipërmarrës në rajon dhe një nga më me ndikim në botë. T-Blocks u veçua si kompania e vetme që zhvillon infrastrukturë financiare të bazuar në blockchain për tregjet në zhvillim, duke forcuar misionin e saj për të lidhur kapitalin global me Evropën Juglindore përmes zgjidhjeve të investimit të rregulluara dhe të udhëhequra nga teknologjia.
Në vijim të këtij partneriteti, T-Blocks do të integrohet me XRPL dhe do të nisë tokenizimin e 50 milionë eurove në asete ekskluzive nga fondet e saj të bazuara në Luksemburg. Ky zhvillim përbën një hap të rëndësishëm përpara për Ballkanin Perëndimor, duke vendosur Shqipërinë dhe rajonin në hartën e financës dixhitale të rregulluar dhe tregjeve globale të kapitalit.
Ky njoftim vjen pas mbështetjes zyrtare që T-Blocks mori nga Kryeministri i Shqipërisë, Edi Rama, i cili vlerësoi rolin e kompanisë në avancimin e inovacionit financiar dhe të investimeve. Gjatë një takimi privat të organizuar nga qeveria, Kryeministri mblodhi zhvilluesit më të mëdhenj të pasurive të paluajtshme në vend për të diskutuar mundësinë e listimit të projekteve të tyre në platformën T-Blocks, duke theksuar rëndësinë në rritje të saj si një portë kombëtare dhe rajonale për investime.
Christina Chan, Drejtuese e Lartë e Rritjes së Ekosistemit në RippleX bwri njw deklaratw nw lidhje me T-Blocks: “Është emocionuese të shohësh ndërtues si T-Blocks të eksplorojnë se si blockchain mund ta bëjë investimin në fusha të tilla si pasuritë e paluajtshme dhe energjia e rinovueshme më të arritshme. Programi XRPL ekziston për të inkurajuar pikërisht këtë lloj eksperimentimi dhe inovacioni që zbaton blockchain në rastet praktike të përdorimit financiar.”
