Microsoft mund të kalojë në një model abonimi me pagesë për Windows 12.
Deskmodder, një website gjerman, zbuloi një tekst të përqendruar te abonimi në kodin për një version të ri të Windows që lë të kuptohen planet e Microsoft për të eliminuar përditësimet falas, sipas Neowin.
Ky do të ishte një ndryshim në rutinën e kompanisë, pasi Microsoft aktualisht ofron përmirësime të Windows 11 falas për përdoruesit e Windows 10 që kanë një PC me specifikat e nevojshme.
Sigurisht, këto janë vetëm disa rreshta kodi që mund të mos nënkuptojnë asgjë. Windows Central theksoi se këto kode mund të jenë referenca për “Abonimin e ri të “Windows 11 IoT Enterprise” dhe jo një version të ri të Windows.
Siç theksoi gjithashtu Windows Central, tarifimi i një abonimi mujor ose vjetor për një OS të tërë kur Apple dhe Google nuk e bëjnë një gjë të tillë nuk do të ishte një pamje e mirë për Microsoft. Kjo mund të bëjë sens për versione të veçanta, por jo për Windows 12 në përgjithësi.
Megjithatë Microsoft nuk e ka konfirmuar ende ekzistencën e Windows 12. Dhe nëse ekziston, mund të quhet diçka tjetër tërësisht pas prezantimit të tij. Ne nuk dimë pothuajse asgjë për versionin e ardhshëm të Windows – përveç faktit që ai mund të prezantohet në vitin 2024.
