Për të luftuar ngrohjen globale, shumë vende të ndryshme përreth globit përdorin burimet e rinovueshme për të gjeneruar energji elektrike. Kohët e fundit, Portugalia theu një rekord ndërkombëtar për prodhimin e energjisë pasi kaloi gjashtë ditë të plota duke u mbështetur vetëm në energjinë e rinovueshme.
Duke filluar nga pajisjet elektroshtëpiake e deri tek fabrikat e mëdha në vend, që të gjitha funksionuan me energjinë e gjeneruar nga era, uji, ose dielli për gjashtë ditë rresht. Midis orës 4:00 të mëngjesit të 31 tetorit dhe orës 9:00 të mëngjesit të 6 nëntorit, kombi prej dhjetë milionë banorësh mbështetej vetëm në energjinë e rinovueshme, pasi u gjeneruan 1102 GWh.
Kjo e ka tejkaluar konsumin kombëtar për të njëjtën periudhë me 262 GWh, ndërkohë që rekordi i mëparshëm ishte vendosur në 2019 për një periudhë mbresëlënëse prej 131 orësh. Ndërsa shumë vende ende mbështeten në lëndët djegëse fosile si një formë energjie, Portugalia ishte në gjendje të prodhonte më shumë energji të rinovueshme se nevojitej për të funksionuar për gjashtë ditë rresht.
Hugo Costa, drejtuesi i EDP Renewables, tha: “Uzinat e gazit ishin aty, duke pritur të dërgonin energji, nëse do të duhej. Për fat të mirë nuk kishte nevojë sepse era po frynte dhe po binte shumë shi. I gjithë ky prodhim ka një ndikim pozitiv tek konsumatorët sepse çmimet kanë rënë në mënyrë drastike, pothuajse në zero.”
Testi i fundit i suksesshëm në Portugali vjen pasi vendet synojnë të arrijnë objektivat e klimës së Marrëveshjes së Parisit deri në vitin 2050.
