Mammoth, objekti më i madh industrial i ndërtuar deri më tani për të filtruar dioksidin e karbonit nga ajri, sapo nisi punën në Hellisheiði, Islandë. Drejtohet nga kompania zvicerane e teknologjisë klimatike Climeëorks, klientët e së cilës përfshijnë JPMorgan Chase, Microsoft, Stripe dhe Shopify, ndër të tjera.
Ishte impianti më i ri industrial i ndërtuar me qëllim thithjen e dioksidit të karbonit nga ajri, një proces i quajtur direct air capture (DAC) – me më shumë objekte të planifikuara për t’u ndërtuar në mbarë botën. DAC supozohet të jetë një mënyrë për të luftuar ndryshimet klimatike duke hequr qafe emetimet e gazit serrë që janë krijuar në atmosferë, por procesi ende duhet të provojë se mund të rritet mjaftueshëm për të pasur një ndikim domethënës.
Mammoth është uzina më e madhe DAC që ka nisur të funksionojë. Por në skemën e madhe, është relativisht e vogël në krahasim me projektet e tjera. Operacionet e Climeworks në Islandë kishin për qëllim t’i tregonin botës se kjo teknologji mund të funksionojë. Tani, do të duhet të shihet nëse mund të përsërisë atë sukses të hershëm në një treg në rritje në SHBA.
Në vitin 2017, Climeworks u bë kompania e parë që thith dioksidin e karbonit nga ajri dhe e shiti atë si produkt që përdoret në pije të gazuara dhe në sera. Ajo bëri një hap të madh përpara në Islandë në vitin 2021, ku hapi fabrikën DAC Orca për të filluar kapjen e CO2 dhe ruajtjen e përhershme të tij nën tokë për klientët, përfshirë Microsoft. Orca ishte uzina më e madhe e DAC në funksion deri më tani.
Mammoth do të jetë në gjendje të kapë gati 10 herë më shumë CO2 se Orca pasi të jetë plotësisht funksionale, rreth 36,000 ton dioksid karboni në vit. Kjo nuk është ende një sasi e madhe karboni, duke pasur parasysh se vetëm Microsoft emetoi afër 13 milionë tonë metrikë dioksid karboni në 2022.
