Komisioni Evropian lajmëroi se do të krijojë Zyrën e Inteligjencës Artificiale, që do të ketë si detyrë zbatimin e Aktit të sapolindur të Inteligjencës Artificiale në nivel të Bashkimit Evropian, me operacionet që do të fillojnë në muajt e ardhshëm.
Agjencia e re do të mbikëqyrë rregullat për sistemet e AI për qëllime të përgjithshme dhe do të funksionojë si një organ qendror koordinues për politikën e AI në nivel të BE-së, duke u koordinuar me departamentet e tjera të komisionit, agjencitë e BE-së, kompanitë dhe 27 shtetet anëtare të BE-së.
Njoftimi vjen pasi negociatorët e institucioneve të BE-së janë gati të mbyllin një marrëveshje mbi detajet teknike të Aktit të AI, plani i Evropës për të rregulluar aplikacionet e AI me rrezik të lartë, pas një marrëveshjeje politike muajin e kaluar. Ligji i ndan sistemet e AI në katër kategori kryesore sipas rrezikut të mundshëm që ato paraqesin për shoqërinë. Sistemet që konsiderohen me rrezik të lartë do t’i nënshtrohen rregullave të rrepta që do të zbatohen përpara se të hyjnë në tregun e BE-së. Pasi të jenë të disponueshme, ato do të jenë nën mbikëqyrjen e autoriteteve kombëtare, të mbështetura nga zyra e AI brenda Komisionit Evropian.
Komisioni lamëroi gjithashtu për startup-et e AI se do të kenë akses në superkompjuterët e tij. Do të krijohen të ashtuquajturat fabrika të AI për të lehtësuar testimin e algoritmeve nga kompanitë e vogla për të mbështetur përshkallëzimin e modeleve të AI; do të reduktojë kohën e testimit të tyre nga muaj apo vite në javë.
Kompjuterët mund të përdoren vetëm nga startups që nuk kanë fuqinë e tyre llogaritëse dhe mund të testojnë algoritme të dizenjuara për qëllime shkencore dhe jo komerciale. Thierry Breton, Komisioneri për Tregun e Brendshëm tha në një deklaratë sot se fabrikat do të bashkojnë “lëndët e para” për AI: fuqinë kompjuterike, të dhënat, algoritmet dhe talentin, duke shërbyer si një qendër e vetme për startup-et evropiane të AI.
Një zyrtar i BE-së tha në një konferencë për gazetarët se kërkesa për këta kompjuterë po rritet. “Janë rreth gjashtë ndërmarrje fillestare që përdorin kompjuterë në mënyrë aktive, por ka një radhë të gjatë. Nuk jemi në gjendje të plotësojmë kërkesën dhe na duhen zgjidhje të shpejta për të pasur kapacitet më të madh.” Kompjuterët do të përdorin çipa nga prodhuesi amerikan Nvidia.
