Në qershor, Apple më në fund prezantoi headset-in e përfolur prej shumë kohësh, Vision Pro, të cilat u mundësojnë përdoruesve të zhyten në botën 3D në një pajisje të cilësisë shumë të lartë.
Mirëpo ka vetëm një problem: dikush duhet ta ndërtojë ato botë dhe ndërtimi i tyre kërkon shumë punë. Por kjo nuk do të jetë një sfidë vetëm në Apple. Pra, për të ndihmuar në krijimin e asaj përmbajtjeje 3D më të lehtë, Apple është bashkuar me një numër kompanish të mëdha që punojnë në teknologjinë 3D për të shpallur një aleancë që mund të ndryshojë mënyrën se si bëhen projektet 3D.
Aleanca për OpenUSD – një grup i formuar nga Apple, Pixar, Adobe, Autodesk dhe Nvidia – synon të standardizojë dhe zhvillojë një teknologji të quajtur Universal Scene Description (USD) që u krijua fillimisht nga Pixar. Teknologjia i lejon zhvilluesit të lëvizin punën e tyre nëpër një botë plot shërbime për krijimet 3D, duke e bërë shumë më të lehtë për zhvilluesit të ndërtojnë përvoja 3D për çdo gjë, nga VFX dhe animacioni (ku tashmë është miratuar gjerësisht) te lojërat, VR dhe aplikacionet metaverse.
USD është, në thelb, një format skedari për kodimin e skenave 3D, por përshkrimi i tij me terma kaq të thjeshtë e nënvlerëson rëndësinë e tij. Krijimi i përmbajtjes 3D për filma dhe lojëra përfshin gjenerimin, ruajtjen dhe transmetimin e sasive të mëdha të të dhënave – të njohura si “përshkrimi i skenës“. Në këtë hapësirë kërkohen aplikacione të ndryshme për gjëra të tilla si modelimi, ndriçimi, animimi, hijezimi dhe interpretimi, dhe këto zakonisht përdorin formën e tyre të specializuar të përshkrimit të skenës që nuk mund të modifikohet apo as të lexohet nga aplikacione të tjera.
Formati USD e zgjidh këtë problem duke mundësuar që mjetet 3D në të gjithë hapësirën e zhvillimit të “komunikojnë”, duke lejuar që formate të ndryshme të përpilohen së bashku. Krijuesit mund të përdorin USD për të bashkëpunuar në të njëjtën skenë ose projekt në të njëjtën kohë, dhe çdo ndryshim i bërë në një pjesë të atij mjedisi do të pasqyrohet në çdo gjë tjetër që i referohet.
Apple ka shumë për të fituar nga adoptimi i USD. Nëse ky shërbim mbështetet masivisht, mund t’i ndihmojë zhvilluesit të ndërtojnë më lehtë aplikacione 3D për Vision Pro, apo një lloj syzesh AR.
