Kanë kaluar më pak se dy javë që kur Google prezantoi AI Overview në Google Search dhe kritikat publike janë shtuar pasi inteligjenca artificiale ka gjeneruar rezultate të pakuptimta ose të pasakta.
AI Overview është krijuar me qëllimin për të shfaqur një përmbledhje të shpejtë të përgjigjeve për pyetjet e kërkuara në Google Search. Për shembull, nëse një përdorues kërkon mënyrën më të mirë për të pastruar çizmet prej lëkure, faqja e rezultateve mund të shfaqë një “përmbledhje nga AI” në krye me një proces pastrimi me shumë hapa, të mbledhur nga informacioni i sintetizuar nga i gjithë rrjeti. Por përdoruesit e mediave sociale kanë shpërndarë shumë screenshots që tregojnë mjetin e AI duke dhënë përgjigje të pasakta dhe të diskutueshme.
Ja disa shembuj të përgjigjeve të gjeneruara nga AI Overview, sipas screenshots të shpërndara nga përdoruesit:
Kur u pyetën se sa presidentë myslimanë ka pasur SHBA-ja, AI Overview u përgjigj: “Shtetet e Bashkuara kanë pasur një president mysliman, Barack Hussein Obama“.
Kur një përdorues kërkoi për “djathin që nuk ngjit në pica“, shërbimi sugjeroi të shtohej “ngjitës jotoksik në salcë“.
Nga ana tjetër, kur u pyetën: “Sa gjatë mund ta shikoj diellin për një shëndet sa më të mirë“, AI Overview u përgjigj: “Sipas WebMD, shkencëtarët thonë se shikimi në diell për 5-15 minuta, ose deri në 30 minuta nëse keni lëkurë më të errët, është përgjithësisht i sigurt dhe ofron përfitimet më të mëdha shëndetësore.”
Kur u pyet: “Sa gurë duhet të ha çdo ditë“, kjo ishte përgjigja e gjeneruar: “Sipas gjeologëve të UC Berkeley, njerëzit duhet të hanë të paktën një gur të vogël në ditë“, duke renditur vitaminat dhe përfitimet nga kjo dietë.
