Përmes një postimi në rrjetet sociale, Ministri për Ekonominë, Kulturën dhe Inovacionin, Blendi Gonxhja ftoi të gjitha bizneset të aplikojnë për të qenë pjesë e parkut të parë teknologjik dhe shkencor në Shqipëri, Durana Tech Park.
Ky park do të ndërtohet në Xhafzotaj, Durrës, me synim mbështetjen e ndërmarrjeve të vogla dhe të mesme vendase të teknologjisë. Përzgjedhja e këtij pozicioni u bë në bazë të afërsisë me Aeroportin Ndërkombëtar të Tiranës dhe Portin e Durrësit, por edhe sepse në këtë zonë ka akses më të gjërë në tregjet më të kualifikuara të punës në fushën e teknologjisë.
Nëpërmjet kësaj strategjie mund të bëhet më i lehtë tërheqja e investimeve të huaja dhe vendase për të mbështetur krijimin e produkteve të reja inovative. Grupi i ekspertëve që do të jenë pjesë e këtij parku teknologjik dhe shkencor do të ndihmojnë me kërkimin, inovacionin dhe prodhimin e produkteve cilësore teknologjike.
“Nëse jeni një biznes i konsoliduar që kërkon inovacion, një startup teknologjik apo inovator, një institucion arsimor dhe kërkimor, ose një nomad digjital, kjo është një mundësi për t’u bërë pjesë e një ekosistemi inovacioni dhe rritjeje”, tha Blendi Gonxhja në postimin e tij. Prioritet do t’u jepet aplikantëve me numrin më të lartë të punonjësve dhe të ardhurave të deklaruara, të cilët nëse përzgjidhen të jenë rezidentë do të paguajnë 0% tatim mbi fitimin për 15 vite dhe 0% TVSH.
