Grupi i hakerave The Lapsus$ publikuan gjatë ditës së djeshme një koleksion të madh me të dhëna konfidenciale që thonë se i përkasin Samsung Electronics. Ky leak vjen vetëm një javë pasi ky grup publikoi një dokument 20GB me të dhëna të vjedhura nga Nvidia.
Kjo gjë u bë e ditur përmes një lajmërimi të bërë nga ky grup, ku bashkëngjitur gjendej dhe një screenshot i direktivave C/C++ në software-in e Samsung. Më pas ato publikuan një përmbledhje të të gjitha të dhënave të vjedhura, ku përfshihen algoritmet për operacionet e zhbllokimit biometric të smartphone-it, source code i bootloader për të gjitha pajisjet Samsung, source code konfidencial nga Qualcomm, source code për aktivizimin e serverave të Samsung e shumë materiale të tjera.
Nëse detajet e mësipërme janë korrekte, Samsung po vuan një vjedhje masive të dhënash që mund t’i shkaktojnë një dëm të madh kompanisë. Të dhënat e vjedhura u ndanë në 3 dokumente të kompresuara që në total kanë madhësi 190GB, dhe tashmë po qarkullojnë në një torrent mjaft të shkarkuar.
Nuk dihet ende nëse Lapsus$ ka kontaktuar me Samsung për t’i kërkuar një shpërblim në këmbim të të dhënave, siç bënë në rastin e Nvidia.
