Google Earth ka nisur të grumbullojë pamje nga satelitët prej 15 vitesh, duke i ofruar të gjithë personave me akses në internet pamje spektakolare të planetit tonë nga lartësi të ndryshme.
Aplikacioni është i mbushur plot me shërbime, duke përfshirë këtu dhe Timelapse që ju lejon të shikoni se si një vendndodhje specifike ka ndryshuar përgjatë viteve, në qoftë se ka patur zhvillim urban, shpyllëzim apo ndryshime klimatike.
Gjatë kësaj jave Google ka rifreskuar Timelapse me imazhe të reja ajrore nga vitet 2021 dhe 2022. Në këtë mënyrë ju mund të shikoni ndryshimet e bëra në një zonë të caktuar për një periudhë prej 4 dekadash, duke nisur që nga 1984.
“Timelapse në Google Earth është një video time-lapse globale e zmadhueshme e planetit tonë dhe ofron prova të ndryshimit dinamik të Tokës, që nga sistemet vaditëse në shkretëtirën e Egjiptit e deri në zjarret që kanë ndryshuar pamjen e Lassen National Forest të Kalifornisë.” tregon menaxheri i programit Chris Herwig në një postim në blog. “Në këto ndryshime ne mund të shikojmë dhe mënyrën se si qytetet janë përshtatur për të luftuar ndryshimet klimatike, si përshembull fermat e erës në Middelgrunden, Danimarkë, apo instalimet në masë të paneleve diellore në Granada, Spanjë.”
