Robotët me dy këmbë janë pajisje tepër të avancuara, por sapo humbin ekuilibrin, situata shpesh përfundon keq: një shtytje apo një pengesë mjafton që të rrëzohen dhe të dëmtojnë komponentë të shtrenjtë si kamerat. Për të shmangur këtë, studiuesit e Disney Research kanë krijuar një sistem të ri që i ndihmon robotët të bien butë dhe me elegancë, edhe kur graviteti nuk është në avantazhin e tyre.
Teknikat tradicionale për t’i mbrojtur robotët gjatë rënies nuk janë shumë efektive. Disa i ngurtësojnë nyjet, duke bërë që roboti të godasë tokën me forcë; të tjera i lënë plotësisht të lirë, duke i kthyer rëniet në kaos të pakontrolluar. Zgjidhjet e programuara më parë funksionojnë vetëm për lëvizje të ngadalta ose skenarë të parashikueshëm.
Për ta kapërcyer këtë kufizim, ekipi i Disney përdori mësimin përforcues. Në simulime kompjuterike, mijëra robotë virtualë u rrëzuan nga çdo kënd i imagjinueshëm. Sistemi u jepte shpërblim për uljen e goditjes dhe përfundimin e rënies në një pozicion të caktuar, të zgjedhur nga një set pozash artistike. Me feedback të vazhdueshëm, robotët mësuan një strategji të përgjithshme për të realizuar një “rrëzim elegant”, pavarësisht se si niste rënia.
Këto rregulla më pas u transferuan te një robot real me dy këmbë. Studiuesit krijuan 10 pozicione përfundimtare “artistike”, pastaj e shtynin robotin nga kënde të ndryshme. Pavarësisht numrit të madh të rrëzimeve, roboti nuk pësoi dëme dhe përfundoi rëniet në mënyrë të kontrolluar, duke ruajtur pozicionet e synuara.
Hapat e ardhshëm përfshijnë testimin e kësaj metode në robotë të tjerë, parashikimin e rënies përpara se të ndodhë dhe zhvillimin e mekanizmave që i mundësojnë robotit të ngrihet po aq butë sa bie.
