Disa javë më parë, Bashkim Evropian arriti një marrëveshje që do të detyrojë prodhuesit e pajisjeve elektronike të përdorin një karikues të vetëm për pajisjet e tyre, specifikisht USB-C, duke filluar nga viti 2024.
Me sa duket ky lajm është mirëpritur dhe nga disa senatorë demokratë në SHBA, të cilët i dërguan një letër të hapur sekretares Gina Raimondo ku kërkonin që dhe SHBA të ndiqnin këtë rrugëtim.
Në letrën e firmosur nga Bernie Sanders, Elizabeth Warren dhe Ed Markey citohet irritimi i konsumatorëve, rritja e kostove dhe rritja e mbetjeve elektronike në mbarë botën për shkak të përdorimit të kabllove të ndryshëm të karikimit. Gjithashtu u përmend dhe shifra ekzakte e cituar nga BE prej 11,000 tonësh mbetje elektronike në vit që krijohen vetëm nga karikueset.
“Kjo politikë ka potencialin të reduktojë në mënyrë të konsiderueshme mbetjet elektronike dhe të ndihmojë përdoruesit të cilët janë të lodhur nga nevoja për të përdorur kabllo të ndryshme karikimi për pajisje të ndryshme. Bashkimi Evropian në mënyrë të zgjuar ka mbrojtur interesat e përdoruesve duke detyruar kompanitë teknologjike të përdorin një kabëll të vetëm karikimi. Dhe SHBA duhet të bëjnë të njejtën gjë.” lexohet në letër.
USB-C është adoptuar nga pjesa më e madhe e prodhuesve të pajisjeve teknologjike, për shkak të avantazheve që ajo ka si rritja e shpejtësisë së karikimit dhe transferimit të të dhënave.
