Krijuesi i ChatGPT, OpenAI, ka bërë të ditur se qytetarët italianë do të kenë tashmë mundësinë që të aksesojnë ChatGPT pasi kanë aplikuar ndryshime të mjaftueshme që kënaqin rregullatorët italianë.
“ChatGPT është sërisht e aksesueshme nga përdoruesit në Itali. Ne jemi tepër të kënaqur që t’i mirëpresim sërisht, dhe mbetemi të vendosur për të ruajtur privatësinë e tyre.” tha ekipi në një deklaratë.
OpenAI tha se kishte adresuar dhe sqaruar të gjitha pyetjet e ngritura nga Autoriteti Italian i Mbrojtjes së të Dhënave (GPDP) në fund të muajit mars. GPDP e akuzonte ChatGPT se po mblidhte në mënyrë të paligjshme të dhënat e qytetarëve dhe se nuk arrinte të parandalonte aksesimin e materialeve jo të përshtatshme për personat nën moshën 18 vjeç. GPDP u detyrua më pas të ndalonte përkohësisht përdorimin e ChatGPT në Itali.
Kompanisë iu dha një afat 20 ditor për të shpjeguar të gjitha akuzat e ngritura nga autoriteti, dhe nëse gjithçka shkonte siç duhet, ChatGPT do të mund të aksesohej sërisht nga përdoruesit në Itali duke filluar nga data 30 prill.
Bashkë me ndryshimet, OpenAI ka ofruar një formular për të gjithë qytetarët që dëshirojnë të fshijnë të dhënat e tyre personale të grumbulluara nga kompania në bazë të rregullave përgjithshme të mbrojtjes së të dhënave.
