Shtetet e Bashkimit Evropian po diskutojnë nëse duhet të kontribuojnë për të ruajtur aksesin në internet të ukrainasve përmes shërbimit Starlink. Ministri i Jashtëm i Lituanisë, Gabrielius Landsbergis diskutoi këto plane, të cilat janë ende në fazë fillestare me Politico.
Ky propzim vjen pas shenjave paralajmëruese nga Elon Musk se SpaceX nuk mund të paguajë pa afat për internetin që po i ofrohet ukrainasve, pasi kompania që ai drejton po humbet para çdo ditë. Megjithatë përmes një tweet të mëvonshëm ai tregoi se kishte ndërruar mendjen dhe se do të vazhdonte të ofronte internetin falas në Ukrainë.
The hell with it … even though Starlink is still losing money & other companies are getting billions of taxpayer $, we’ll just keep funding Ukraine govt for free
— Elon Musk (@elonmusk) October 15, 2022
Menjëherë sapo u dëgjuan deklaratat e Musk, u rritën shqetësimet në lidhje me sigurinë e Ukrainës dhe telekomunikacionin në këtë vend. Starlink ka qenë shumicën e kohës burimi i vetëm që ka mbajtur të gjallë komunikimin në këtë shtet.
Landsbergis tregoi se aksesi në internet i Ukrainës nuk duhet të mbetet në dorën e një personi të vetëm super të fuqishëm i cili mund të zgjohet një mëngjes dhe të thotë “unë nuk dua ta bëj më këtë gjë”.
“Unë mendoj se do të ishte shumë mirë nëse ne do të arrinim një marrëveshje midis nesh, si një koalicion shtetesh të cilat do të paguajnë për shërbimin Starlink të ofruar nga Musk.” tha Landsbergis.
