Një studim i ri ka treguar se përdorimi i telefonave inteligjentë në tualet lidhet me një rrezik më të lartë për zhvillimin e hemorroideve. Kërkuesit në Beth Israel Deaconess Medical Center në Boston analizuan zakonet e 125 pacientëve që iu nënshtruan kolonoskopisë dhe zbuluan se 66% e tyre përdornin telefonin ndërsa ishin ulur në tualet. Pjesa më e madhe e tyre ishin më të rinj dhe shpesh kalonin mbi 5 minuta në “fron”, krahasuar me vetëm 7.1% të atyre që nuk përdornin telefona.
Rezultatet treguan se përdoruesit e telefonave kishin 46% më shumë gjasa të zhvillonin hemorroide, edhe pasi u morën parasysh faktorë si mosha, gjinia, pesha trupore, aktiviteti fizik dhe ushqyerja me fibra. Përveç kësaj, meshkujt kishin më shumë gjasa të qëndronin përtej 6 minutave në tualet. Një pjesë e madhe e përdoruesve pranuan gjithashtu se kishin më pak aktivitet fizik, gjë që tregon një mënyrë jetese më sedentare.
Aktivitetet më të zakonshme gjatë përdorimit të telefonit ishin leximi i lajmeve (54.3%) dhe rrjetet sociale (44.4%). Ekspertët paralajmërojnë se qëndrimi i gjatë dhe pozicioni i përkulur mbi telefonin mund të favorizojnë kapsllëkun, i cili në vetvete është një faktor tjetër për hemorroidet.
Përveç rrezikut shëndetësor, studiuesit theksojnë edhe aspektin higjienik: bakteret dhe materialet fekale mund të transferohen nga duart në telefon gjatë përdorimit të tualetit dhe më pas të kthehen përsëri në duar. Edhe pse larja e duarve është e domosdoshme, telefoni shpesh mbetet i kontaminuar.
