Më tepër se 6 milionë amerikanë jetojnë me insufiçiencë kardiake kronike, një fenomen që ndodh kur zemra nuk arrin të pompojë gjakun siç duhet. Në këtë mënyrë preken dhe organet e tjera të trupit, të cilat nuk oksigjenohen mirë, gjë që mund të çojë në dëmtimin e organeve apo deri në vdekje.
Megjithatë nëpërmjet studimeve të fundit është zbuluar se terapia e re me qeliza burimore ul rrezikun e zhvillimit të infarkteve apo goditjeve në tru me 58%. “Ne kemi bërë një hap shumë të madh para në shfrytëzimin e qelizave burimore për të trajtuar zemrën.” tha Emerson Perin nga Texas Heart Institute. “Ky testim është një sinjal i fillimit të një epoke të re.”
Për sa kohë nuk ka një kurë specifike për infarktin, doktorët detyrohen të japin medikamente, të edukojnë pacientët në lidhje me ndryshimin e stilit të jetesës ose të kryejnë ndërhyrje kirurgjikale.
“Në këtë mënyrë ne mund të përmirësojmë simptomat tek pacientët, mirëpo rezultati afatgjatë nuk është shumë i mirë.” tregon kardiologu Roberto Bolli.
Kompania Mesoblast ka arritur të zhvillojë një trajtim të ri që përmban qeliza burimore, të cilat njihen për efektet e tyre anti-inflamatore. Këto qeliza burimore vijnë nga palca e kockës së një dhuruesi adult të shëndetshëm, të cilat më pas shumohen në laborator.
“Këto qeliza adresojnë në mënyrë direkte inflamacionin. Kur i vendosim këto qeliza në një zemër të inflamuar, ato bëjnë të mundur aktivizimin e qelizave për të luftuar inflamacionin.” tha Emerson Perin.
Përgjatë testimit të 537 pacientëve që po merrnin aktualisht trajtim për insufiçiencën kardiake, u bë një injektim i vetëm me 150 milionë qeliza burimore. Në pacientët e trajtuar me qeliza burimore u vu re një rënie me 58% e rrezikut të zhvillimit të infarktit.
