Një kapsulë orbitale që përmban një fabrikë të vogël farmaceutike pa pilot lëvizi nëpër shkretëtirën e Jutas këtë shkurt duke mbajtur në bord kristale të sapoprodhuara të barnave për HIV dhe jo vetëm.
Kjo kapsulë ishte kulmi i katër viteve punë nga një kompani e re me bazë në Kaliforni, Varda, e cila shpreson të përdorë kushtet unike të mikrogravitetit në orbitën e ulët të Tokës për të prodhuar barna më të pastra dhe më të lira. Reaksionet kimike të vogla në shkallë molekulare të një prodhuesi të ilaçeve mund të çojnë në krijimin e formave të padëshiruara të tyre vetëm për shkak të veprimit të tërheqjes gravitacionale të Tokës, prandaj po eksplorohet krijimi i këtyre ilaçeve në kushte gravitacionale shumë pranë 0.
Varda nuk është e vetmja kompani që hyn në garën hapësinore të industrisë farmaceutike si një përpjekje për të përmirësuar këto kushte për krijimin e molekulave kristalore të barnave. Gjigandi i barnave Eli Lilly dhe një mori universitetesh që kanë bashkëpunuar me National Lab të International Space Station kanë filluar gjithashtu testimin e platformave orbitale për gjithçka, nga barnat për trajtimin e kancerit e deri te kërkimi rreth sëmundjes Alzheimer.
“Ndikimi i mikrogravitetit duket të jetë shumë efektiv në gjenerimin e materialeve të pastra kristalore që kanë veti unike”, tha profesoresha e biokimisë Anne Wilson në Universitetin Butler për Wall Street Journal këtë javë. Wilson – e cila ka kryer kërkime mbi kiminë e kristalizimit në mikrogravitet, por nuk ka lidhje të drejtpërdrejtë me Varda – vuri në dukje se mikrograviteti bën të mundur përmirësimin e strukturave molekulare për një mori materialesh të veçanta, brenda dhe jashtë mjekësisë. Varda aktualisht është duke analizuar rezultatet e testit të prodhimit të barnave HIV me bazë në hapësirë, sipas shefit të shkencës së kompanisë Adrian Radocea.
Projekti, i cili fabrikonte ilaçin ritonavir, filloi në qershor 2023. Kompania tani po përgatitet për dy fluturime të ardhshme, të cilat do të nisin këtë vit duke filluar në qershor ose korrik në bordin e një rakete të ripërdorshme SpaceX, sipas bashkëthemeluesit dhe presidentit të Varda, Delian Asparouhov.
Sipas bashkë-themeluesit të kompanisë, Josh Wolfe, kjo praktikë do të bëjë të mundur uljen e kostove për prodhimin e barnave shumë të shtrenjta jetëshpëtuese, duke i bërë ato më lehtësisht të aksesueshme.
