Defense Advanced Research Projects Agency e SHBA-së (DARPA) ka vendosur një rekord të ri botëror në transmetimin pa tela të energjisë, duke dërguar mbi 800 watt në një marrës të vendosur 8.6 kilometra larg. Ky arritje shënon një hap të madh në zhvillimin e teknologjisë së transferimit të energjisë pa kabllo (ËPT) – një ide që daton që nga eksperimentet e Nikola Tesla.
Në testin e fundit, të zhvilluar në New Mexico, ekipi i programit Persistent Optical Wireless Energy Relay (POWER) përdori rreze lazer për të dërguar energji për 30 sekonda në distancë rekord. Për krahasim, rekordi i mëparshëm ishte vetëm 230 watt në 1.7 kilometra për 25 sekonda. “E kemi tejkaluar plotësisht çdo demonstrim të mëparshëm në fuqi dhe distancë,” tha menaxheri i projektit, Paul Jaffe.
Sistemi funksionon duke dërguar një rreze lazer drejt një marrësi të pajisur me një pasqyrë parabolike që e përqendron dritën mbi qeliza diellore, të cilat e kthejnë atë në energji elektrike të përdorshme. Testi, ndonëse jo shumë efikas –me konvertim energjie rreth 20% – tregoi se transmetimi në distanca të tilla është i mundur edhe nën ndikimin e plotë të atmosferës.
Sipas DARPA-s, qëllimi afatgjatë është krijimi i një sistemi që mund të dërgojë menjëherë energji në zona të vështira, si fushëbeteja apo zona katastrofash, pa pasur nevojë për karburant apo transport fizik. Në të ardhmen, kjo teknologji mund të përdoret për drone ose mjete pa pilot, duke i lejuar të qëndrojnë funksionalë për periudha shumë më të gjata.
Për ta shënuar arritjen me humor, ekipi përdori një pjesë të energjisë së transmetuar për të pjekur kokoshka, një homazh ndaj filmit klasik Real Genius, ku një shtëpi mbushet me kokoshka nga një rreze lazer.
