Pas shkëmbimit të “zjarrit” me presidentin Trump, Twitter rikthehet me idetë e reja për një rrjet social sa më të shëndetshëm.
Shpërndarja e artikujve është një normalitet i përditshëm në këtë platformë dhe padyshim ndihmës për këdo që dëshiron të zgjerojë intelektin. Por krejt e kundërta me individë që shpërndajnë artikuj pa i lexuar fare, të shtyre thjesht nga titulli duke dalë në konkluzione të pasakta e duke kontribuar kështu në fenomenin “fake news.”
Në një tentativë për të “promovuar diskutime të informuese” Twitter ka testuar një opsion të ri në disa aparate Android. Nëse një artikul nuk e ke lexuar, përpara se ta shpërndash një tabelë do të të pyesë nëse je i sigurt.
Problemi i përdoruesve që shpërndajnë informacion pa i lexuar ka ekzistuar gjithmonë. Një studim i 2016 nga Columbia University dhe Microsoft zbuloi se 59% e linqeve të postuara në Twitter nuk janë klikuar kurrë.
Një tjetër studim deklaron se “70% e përdoruesve të Facebook lexojnë vetëm titullin e materialeve shkencore përpara se të komentojnë” dhe kështu lind keq informimi dhe debati i dobët bazuar në asgjë.
Kjo zgjidhje nga Twitter nuk synon ta ndalojë plotësisht, por së paku të shtojë pak pengesë përpara se të veprojnë në mënyrë të papërgjegjshme.
Në kuadër të një rrjeti social sa më të shëndetshëm, kompania solli në maj edhe një tjetër opsion i cili kur ndjen se je duke i dërguar dikujt një tweet me “gjuhë të dëmshme” të kërkon ta rishikosh edhe një herë. Kjo për të parandaluar “hate speech” (të folurën me urrejtje) por edhe sepse ndonjëherë në nerva e sipër shprehemi agresivisht andaj një frenim i paraprak mund të ndikojë sidoqoftë.
