Gjatë ditëve të fundit ka patur shumë raportime nga përdoruesit e iPhone-ve se në iMessage të tyre kanë ardhur mesazhe nga adresa të ndryshme iCloud që nuk i njohin, të cilët mund të vjedhin të dhënat tuaja.
Mashtruesit kanë gjetur një “skemë të bukur” duke treguar se marrësit e këtij mesazhi do të përfitojnë shuma të konsiderueshme parash nëse do të ndjekin instruksionet që ata japin në mesazhe. Më pas këta mashtrues i drejtojnë përdoruesit që të komunikojnë në aplikacionin Telegram. Ata tentojnë t’ju joshin duke thënë se ju mund të fitoni përmes një pune shumë të thjeshtë në celular $35 deri në $1,000 në ditë, dhe që këtu fillojnë dyshimet e para.
Nëse ju do të ndiqni të gjitha hapat që këta persona ju rekomandojnë, ata do të vjedhin të gjitha të dhënat tuaja personale, kështu që duhet të tregoheni shumë të kujdesshëm.
Policia e Shtetit ka mësuar rreth këtij fenomeni dhe i bën thirrje të gjithë qytetarëve përmes një postimi në rrjetet sociale që të mos bien pre e këtij mashtrimi.
“Nqs ju ka ardhur një mesazh i tillë, dhe ju keni shpërndarë të dhënat tuaja personale, apo jeni mashtruar nga një aktivitet i tillë, ju ftojmë të paraqiteni pranë zyrave tona si dhe zyrave policore të Krimeve Kompjuterike dhe Kibernetike në Drejtoritë Vendore të Policisë dhe Drejtorisë për Hetimin e Krimeve Kompjuterike e Kibernetike në DPPSH.” shkruan Policia e Shtetit në Facebook.
