Ka kaluar pak më tepër se një muaj pas prezantimit të smartphone-ve më të rinj flagship nga Samsung, Galaxy Z Fold 4 dhe Z Flip 4, mirëpo në internet kanë filluar të qarkullojnë renderat e parë të serisë Galaxy S23.
Smartprix ka publikuar disa renders që ato kanë krijuar të Galaxy S23+, të cilat shfaqin pajisjen nga çdo cep i saj.
Me sa duket nga këto pamje Samsung do të largohet nga ishulli i kamerave tepër i veçantë që u përdor gjatë dy viteve të fundit në S21 dhe S22. Tashmë të 3 kamerat do të kenë një dalje të veçantë në pjesën e pasme të smartphone-it, në mënyrë të ngjashme me Galaxy S22 Ultra.
Ne mund të vëmë re gjithashtu se në rendera nuk tregohet vendi i posaçëm për kartën SIM në fund të smartphone-it, mirëpo mos u shqetësoni, pasi këto nuk janë fotografi zyrtare. Mundësia që Samsung të heqë vendin për kartat SIM gjatë gjeneratës së re të smartphone-ve flagship është shumë e vogël. Madje dhe Apple po eksperimenton vetëm në SHBA me përdorimin e kartave eSIM.
Në pjesën e parme të Galaxy S23+ pritet të kemi një ekran 6.6” me dimensione pak më të ndryshme se S22+, duke qenë pak më e gjërë dhe e gjatë në krahasim me S22+ (157.7 x 76.1 x 7.6 në vend të 157.4 x 75.8 x 7.6 mm).
Këto janë të gjitha informacionet e bëra leak për momentin dhe pritet të zbulojmë akoma më shumë në javët në vijim.
