Gjatë ditëve të fundit Samsung është kritikuar nga disa përdorues të cilët akuzonin kompaninë se po gjeneronte fotografi të rreme sa herë që shkrepej një fotografi e Hënës. Gjithçka filloi pas komenteve të një përdoruesi të Reddit, u/ibreakphotos, i cili vendosi një imazh jo shumë të qartë të Hënës në monitorin e tij dhe shkrepi një fotografi me Samsung S23 Ultra.
Fotografia e gjeneruar nga smartphone-i ishte më e qartë se ajo që përdoruesi i Reddit kishte vendosur në monitorin e tij, duke ngritur kështu dyshimet se Samsung po falsifikonte fotografitë e Hënës.
Kompania u detyrua të bënte një postim të gjatë në blog ku shpjegon se si ky modalitet funksionon. Samsung përdor Scene Optimizer, AI Deep Learning dhe Super Resolution në fotografitë e saj. Kur smartphone-i kupton se ju dëshironi të shkrepni një fotografi të Hënës, Scene Optimizer hynë në punë së bashku me AI Deep Learning, dhe në fund Super Resolution aplikon një proçesim multi-frame për të përmirësuar pamjen e Hënës.
Pra teknikisht fotografitë e shkrepura nga pajisjet Samsung të Hënës nuk janë fotografi të rreme, ato thjesht janë të përmirësuara duke përdorur AI. Në realitet, ne nuk marrim pamjen finale nga sensori i smartphone-it tonë, pasi ai përpunohet nga motori i proçesimit.
Për të shkrepur fotografi shumë të pastra të Hënës nevojitet një lente gjigante, një tripod si dhe kamera specifike shumë të shtrenjta.
