OnePlus do të jetë kompania më e re e cila do të prezantojë një pajisje të palosshme, dhe leaker-i i besueshëm, Steve Hemmerstoffer (OnLeaks), ka shfaqur disa render që tregojnë se si do të duket OnePlus V Fold nga të gjitha këndet.
Këto fotografi nuk janë foto zyrtare, por janë renders të prodhuara në bazë të dokumenteve CAD që iu shpërndahen prodhuesve të aksesorëve për këtë smartphone.
Meqë OnePlus është pjesë e BKK, pritshmëritë ishin jo shumë të larta për sa i përket smartphone-it të palosshëm, sepse mendohej se ky smartphone do të ishte thjesht një pajisje e palosshme ekzistuese, si përshembull Oppo Find N2, por e ribranduar. Në të vërtetë nga renders ne mund të shikojmë se kjo pajisje nuk ngjason aspak me Oppo Find N2, por është më e përafërt nga formati me Samsung Galaxy Fold.
Ishulli i kamerave në pjesën e pasme përfshihet në një rreth të madh, njësoj si në smartphone-t OnePlus që janë prezantuar gjatë kohëve të fundit. Në këtë ishull gjenden 3 kamera, njëra prej të cilave është periscope dhe ofron zmadhim optik.
OnePlus ka vendosur që në ekranin e jashtëm kamera selfie të gjendet në mes të pjesës së sipërme të ekranit, ndërkohë që në ekranin e brendshëm kamera gjendent në cepin e majtë. Si zakonisht, një ndër shërbimet më të mira në një smartphone OnePlus do të mbetet karikimi, pasi bateria me kapacitet 4,800mAh do të mund të karikohet shpejt me karikuesen SuperVOOC 100W.
