Google ende nuk i ka zbuluar zyrtarisht të gjitha veçoritë e Android 15. Kompania ka theksuar vetëm disa ndryshime themelore të përqendruara për zhvilluesit, me zbulimin e plotë të vendosur për konferencën vjetore I/O në maj. Ndër të tjera, Android 15 duhet të përfshijë një shërbim të ri të quajtur Private Space, duke ju mundësuar të zhvendosni aplikacionet tuaja private në një profil të veçantë në telefon për privatësi shtesë. Më shumë detaje rreth kësaj veçorie janë shfaqur në internet, duke përfshirë mënyrën se si do të funksionojë.
Eksperti i Android, Mishaal Rahman zbulon punën e vazhdueshme të Google për Private Space bazuar në disa kode të gjetura në Android 14 QPR3 Beta 2.1. Kompania duket se ka rinovuar procesin e konfigurimit për të ofruar më shumë informacion rreth veçorisë dhe se si do të funksionojë. Si pjesë e kësaj, përdoruesit tani informohen të mos e shkarkojnë Play Store pasi është pjesë e vetë sistemit.
Përdoruesit paralajmërohen gjithashtu të krijojnë një llogari të re Google për hapësirën private gjatë konfigurimit. Përndryshe, ekziston rreziku i rrjedhjes së disa të dhënave, si “fotot e sinkronizuara, skedarët, emailet, kontaktet, ngjarjet e kalendarit dhe të dhënat e tjera“. Për më tepër, përdoruesit paralajmërohen se nuk mund ta zhvendosin hapësirën e tyre private në një pajisje tjetër. Në vend të kësaj, do t’ju duhet të konfiguroni përsëri hapësirën në telefonin tuaj të ri.
Për arsye sigurie, mund të përdorni një PIN/fjalëkalim/pattern të ri për Private Space, megjithëse mund të përdorni kodin ekzistues të telefonit tuaj. Opsioni për të përdorur vërtetimin biometrik për qasje të shpejtë është gjithashtu i pranishëm.
Pasi të konfigurohet Private Space, thuhet se mund të aksesohet dhe personalizohet nga Settings > Security and Privacy > Private Space. Opsionet përfshijnë kyçjen automatike të shërbimit pas një kohe të caktuar, fshehjen e hapësirës që të mos shfaqet në sirtarin e aplikacioneve dhe shfaqjen e njoftimeve të ndjeshme në lock screen kur hapësira private është e shkyçur.
