Presidenti Donald Trump ka kërcënuar me tarifa doganore 30% ndaj importeve nga Bashkimit Evropian dhe Meksikës, duke përshkallëzuar fushatën e tij të tarifave që nga kthimi në detyrë në janar. Këto tarifa do të prekin të gjitha importet, përveç disa “Tarifave Sektorale” si tarifa 25% për automjetet, dhe pritet të hyjnë në fuqi më 1 gusht.
Në letrat drejtuar Presidentes së Komisionit Evropian Ursula von der Leyen dhe Presidentes së Meksikës Claudia Sheinbaum, Trump theksoi nevojën për “tregti të balancuar dhe të drejtë” dhe akuzoi të dyja palët për praktika të padrejta. Ai paralajmëroi se çdo tarifë hakmarrëse ndaj mallrave amerikane do të përballet me kundërmasa të barabarta, të cilat do t’i shtoheshin tarifës 30%.
Von der Leyen kritikoi vendimin, duke thënë se BE-ja do të mbrojë interesat e saj dhe mund të zbatojë kundërmasa me vlerë mbi 24.5 miliardë dollarë ndaj mallrave amerikane nëse nuk arrihet një marrëveshje. Presidenti francez Macron kërkoi gjithashtu përgatitje për kundërmasa të besueshme.
Meksika, e cila deri tani tregtonte pa tarifa nën marrëveshjen USMCA, u godit gjithashtu. Trump e lidhi vendimin me përpjekjet për të ndalur trafikun e fentanylit. Ministri i Ekonomisë i Meksikës e quajti këtë vendim të padrejtë, por tha se po vazhdojnë negociatat.
Administrata Trump është gjithashtu kundër tatimeve për shërbimet digjitale në disa vende të BE-së, të cilat, sipas saj, diskriminojnë kompanitë teknologjike amerikane.
Këto veprime kanë tronditur tregjet globale dhe janë kritikuar për krijimin e pasigurive ekonomike, por Trump vazhdon të mbajë një qëndrim të ashpër ndaj tregtisë ndërkombëtare.
