Lajmi për një seri të re të kartmonedhave të Shqipërisë nuk është më i ri, ato i kemi parë që në fundin e 2019 kur prerjet prej 200 dhe 5000 Lekësh u hodhën në qarkullim.
Megjithatë Banka e Shqipërisë ka njoftuar se të gjitha prerjet e parasë të republikës tonë do të marrin këtë përditësim madje edhe një prerje të re prej 10,000 Lekësh. Këto të fundit do të hidhen në treg gjatë viteve 2020-2022.
Kjo sipas Drejtorit të Departamentit Të Emisionit, Virjon Lalollari.
Ndër të tjera ai shprehet se bazuar në shembujt e marrë nga shtetet e tjera është i nevojshëm një proçes riprintimi, kjo për shkak të avancimit të teknikave të përdorura për realizimin jo vetëm estetik të saj por edhe atë sigurisë mbi të gjitha.
Kartmonedha 200 Lekë printohet në polimer për të qenë më rezistente pasi ajo do të përdoret më shpesh, ndërsa Skënderbeu që qarkullon më pak përbëhet nga letra e pambukut.
Në këtë proçes integrohen edhe elementet e sigurisë siç janë për kartmonedhën 200 Lekëshe relievi i shtypit, dritarja e tejdukshme, shqiponja e stilizuar dhe shiriti i shndritshëm.
Tek kartmonedha 5000-she dallohet relievi, figura ujore, filli i sigurisë, hologrami, përkrenarja reflektuese dhe shiriti i shndritshëm. Për më shumë informacion për prodhimin e kësaj linje të re ndiqni videon nga vetë Banka e Shqipërisë.
