Në Tiranë u mbyll këtë javë një konkurs ndërkombëtar për rikualifikimin e Pallatit të Sportit “Asllan Rusi”. Sipas njoftimeve zyrtare, fitues u shpall studioja MVRDV nga Holanda, me propozimin “Grand Ballroom”, një arenë e re që e rimendon godinën si nyje të përditshme sporti, kulture dhe jete publike. Prezantimet e ekipeve finaliste u zhvilluan më 16 tetor 2025 në kryeqytet dhe projekti i MVRDV u vlerësua për idenë e qartë dhe lidhjen me qytetin.
“Asllan Rusi” vetë është një sallë ikonike e Tiranës, e hapur në vitet 60`(ish “Pallati i Sportit Partizani”), projekt i arkitektit Koço Miho. Që prej vitit 1996 mban emrin e volejbollistit të shquar Asllan Rusi (1944–1983).
Koncepti
Ideja fituese e sheh arenën si një kupolë të rrumbullakët, të lexueshme si “top basketbolli”. Forma e thjeshtë bën që objekti të dallohet menjëherë, ndërsa sheshi me shkallë përpara e kthen hyrjen në një moment publik: vjen, pret, ulesh, feston. Brenda, udhëtimi i vizitorit është linear: nga sheshi në holl, nga holli te tribunat, e më pas në fushë.
“Dritaret urbane”
Fasada hapet me “Urban Windows”, prerje të mëdha që lejojnë pamje brenda–jashtë dhe sjellin dritë natyrale. Me këtë gjuhë, arena nuk sillet si volum i mbyllur por komunikon me rrugën dhe tregon ritmin e brendshëm edhe kur s’ka event.
Brendësia: “honeycomb”
Organizimi i brendshëm bazohet në një modulim qelizor (“honeycomb”) që vendos në mënyrë të kuptueshme tribunat, hapësirat e ekipeve, zonat e shërbimit dhe hapësirat publike. Kjo logjikë mban qartësi dhe fleksibilitet për evente të ndryshme.
Levizshmëria
Lëvizja e publikut ndahet qartë nga ato të ekipeve, medias dhe hotelit; parkimi pozicionohet nëntokë dhe shpërndan trafikun e ditës së eventit pa ngarkuar hapësirat publike. Kjo skemë synon ditë ndeshjeje të kontrolluara dhe ditë të zakonshme komode.
Jeta e përditshme
Objekti nuk “fiket” kur s’ka ndeshje. Rreth bazës shtrihen retail dhe food hall, ndërsa sky bar-i dhe hoteli e mbajnë ndërtesën aktive gjatë gjithë ditës. Plaza përpara shërben si fan zone e hapur, vend takimi e pritjeje, apo skenë për aktivitete të vogla komunitare.
Sharmi i arenës
Funksioni kthehet në përvojë: disa dhoma hoteli kanë pamje nga fusha, oborri i banesave sjell qetësi brenda një objekti energjik, sky bar-i hap horizontin drejt skyline-it të Tiranës. Qëllimi është një arenë e lehtë për t’u arritur, për t’u kuptuar dhe për t’u dashur.
Numrat që duhen ditur
- Kapaciteti i arenës: rreth 6,000 ulëse (përfshirë tribuna të përkohshme).
- Sipërfaqe mbi tokë (përafërsisht): Arena ~13,500 m², Retail ~8,400 m², Hotel ~9,200 m² (rreth 88 dhoma), Banim ~28,650 m².
- Nëntoka: rreth 30,450 m² për parkim dhe shërbime teknike.
- Elementë të tjerë: Urban Windows ~1,007 m², Courtyard ~2,950 m², Roof ~1,379 m²; GFA mbi tokë ~59,750 m².
Çfarë gjen brenda
- Arenë multifunksionale për basketboll, volejboll, koncerte, e-sports, panaire dhe ngjarje korporate dhe pamje të qarta nga çdo kënd.
- Hotel & mikpritje: shërbime hotelerie dhe disa dhoma me pamje në fushë.
- Banim: apartamente me oborr të brendshëm dhe qarkullime të dedikuara.
- Retail & food hall: dalje si drejt bulevardit, ashtu edhe te plaza e eventeve.
MVRDV në Tiranë
MVRDV, një nga studiot më të mëdha dhe më të suksesshme në botë, po i jep formë edhe Tiranës, nga ndërhyrjet publike te volumet e reja duke e shtyrë qytetin drejt dimensioneve moderne. Para “Grand Ballroom”, MVRDV ka punuar në disa pika të rëndësishme të kryeqytetit, duke kombinuar hapësira publike dhe programe të përziera: Piramida e Tiranës (rikualifikim me funksione publike/edukative), Tirana Boulevard (ndërtesë miks me një “urban room” të brendshëm), Downtown One (kullë miks me fasadë “piksel”) dhe Skanderbeg Building. Këto prirje ndihmojnë të lexohet ambicia e arenës së re: karakter i fortë, por jetë e përditshme.
