Kledian Leka, 23 vjeç, një djalë me origjinë shqiptare që banon në Casalmaggiore (Cremonese), është i diplomuari i parë i verbër në Fakultetin e Shkencave Kompjuterike në Universitetin e Parmës.
Në përfundim të kursit trevjeçar kaloi shkëlqyeshëm testin me pikët maksimale në tezën e titulluar: “Edukimi i Shkencave Kompjuterike. Strategjitë dhe mjetet për akses gjithëpërfshirës për studentët me aftësi të kufizuara në shikim.”
“Teza ime mund të jetë një manual për të ndihmuar fëmijët me dëmtime të plota ose të pjesshme të shikimit. Nuk kishte materiale mësimore për nxënësit e verbër, kështu që u nisa për të përkthyer dhe konvertuar të gjitha dokumentet tradicionale mbi të cilat ata studionin në braille, në mënyrë që ato të ishin edhe të lexueshme. për ne të verbërit”, ka thënë ai për edicionin milanez të Corriere della Sera.
Klediani, si një pionier i vërtetë, u dha një pyetësor nxënësve të tjerë të verbër, në të cilin u kërkonte të tregonin propozimet dhe mbi të gjitha pengesat që ishin për t’u kapërcyer, të cilat u përfshinë në tezën e tij.
Gjatë rrugës ai takoi kolegë studentë, të cilët falë angazhimit të tij, kanë shpresa më konkrete për të ecur përpara.
“Nga sot Universiteti i Parmës, dhe ndoshta universitete të tjera, do të kenë një pikënisje me të cilën do të krahasohen dhe nga e cila do të marrin frymëzim për të përmirësuar aksesin.“
Klediani, i cili në moshën 11-vjeçare mbeti viktimë e një aksidenti që i hoqi shikimin, është programues i një kompanie shumëkombëshe. “Vazhdova të punoja, nga ora 08:00 deri në 13:00. Pastaj, nga ora 14:00 deri në 2:00 u angazhova për të studiuar. Nuk kam menduar kurrë të ndalem dhe të ndjej keqardhje për veten time dhe vendosa të luftoj për të realizuar të gjitha ëndrrat e mia”.
Ai u diplomua si ekspert IT me nota të larta, deri në vitin 2020 bashkëpunoi me Muzeun Bijou të Casalmaggiore për të krijuar lehtësira për personat e verbër në komunitet. Tashmë ai është i regjistruar në regjistrin kombëtar të mësuesve të IT dhe është kualifikuar për të trajnuar atletë të verbër pasi ushtroi atletikën në nivel garues për dy vjet. Ai gjithashtu drejton një blog aksesueshmërie të quajtur Le chiave dell’accessibilita.
